Hipokrizia ka emër!
nga Agim Popoci
Ata që 19 vjet më parë e akuzonin projektin e papërsëritshëm të PDK-së në krye me Hashim Thaçin me Qeverinë Hije duke tundur gishtin se këta janë kriminelë, ata që 11 vjet më parë akuzonin ata pak kundërshtarë sa ishim të Gjykatës Speciale se jemi kundër Kosovës shtet të pavarur dhe sovran, ata që sot nuk i lënë as të mërziten siç duhet bashkëluftëtarët e UÇK-së pse krerët e tyre mbahen padrejtësisht në Hagë, batonë e buzhalë në krye me Edi Ramën, sot kanë marrë bajrakun e lirisë, japin leksione drejtësie, kërkojnë shpërbërjen e kësaj Gjykate, sepse, sipas tyre, liria paska emër!
Dhe, populli i mjerë shqiptarë, si zakonisht pa memorie, hidhet në gjirin e këtyre patriotëve matrapaz të bindur se këta vërtetë e duan lirimin e Hashim Thaçit, Kadri Veselit, Jakup Krasniqit dhe Rexhep Selimit, dhe, fajtorë janë vetëm ata që ky grup i frikshëm i manipulimit të opinionit publik sot i akuzon si për të drejtën e luftëtarëve të UÇK-së, padrejtësitë e Gjykatës Speciale dhe së fundi PDK-në pa Hashim Thaçin!
Po, LIRIA ka emër, dhe për të do të protestojnë sot veteranët e UÇK-së, familjarët e tyre dhe shqiptarët normal, të cilët edhe pse në një kohë u manipuluan nga batonë e buzhalë tashmë e kanë kuptuar pse u hodh në tregun politik Qeveria Hije, pse u aktivizua Edi Rama për ti bërë presion krerëve të UÇK-së të votojnë Gjykatën Speciale, pse u krijua kjo Gjykatë, pse u kërkua ndarja e Kosovës, pse u kundërshtua integrimi i Veriut të Kosovës, dhe pse morën bajrakun e të drejtës gjithë ky llum shqiptarë për të na treguar se sa shumë e duan Hashimin dhe se si Bedri Hamza nuk e bënë dot liderin e PDK-së!
Sepse, edhe HIPOKRIZIA ka emër!
Sot, në marshin “Drejtësi, jo politikë” që do mbahet në Prishtinë, padyshim më të zëshmit do të jenë batonë e buzhalë që PDK-në dhe Hashim Thaçin në vitin 2007 i quanin kriminel, duke bërë që edhe familjarët që më të dashurit e tyre që i kanë në Hagë, të ndjehen të huaj; Sepse, është pikërisht petku i hipokrizisë me të cilin shfaqen në publik që i frymëzon të ndjehen superior përballë atyre që vazhdojnë e ndjehen fajtorë edhe pse ishte ky grup i batonëve e buzhalëve që i akuzoi dhe hodhi vrer në mediat e kohës, si për Hashim Thaçin ashtu dhe gjithë PDK-në, kohë kur e kishin të ndaluar të shfaqeshin edhe në televizionin publik të RTK-së ndërsa grupi me mburrje shkruanin se si po hanin burek me Ismet Beqirin!
Sot, po, mund të fajësohet edhe Hashim Thaçi pse ata u futën në paradhomën e pushtetit dhe më pas e pushtuan të tërin, por, për Gjykatën Speciale në Hagë është një e vërtetë që nuk e mohojnë dot, jo, sot pas 11 viteve por edhe pas 110 viteve, se ishin ata që e votuan dhe bindën të tjerët se themelimi i kësaj Gjykate ishte rruga e vetme!
Sot, batonë e buzhalë thonë se kërkuan shpërbërjen e Gjykatës Speciale sepse në vitin 2017 e kuptuan nga “amerikanët” në Tiranë se Hashim Thaçi do të arrestohet, dhe, pa kërkuar falje kishin marrë bajrakun e çlirimtarë për ta shpërbërë këtë Gjykatë!
Dhe, jo vetëm kaq! Nuk u skuqën as me turpërimin që lejuan ti bënte Evropa, Hashim Thaçit, kur ai ishte nis drejt Washingtonit për të firmosur Marrëveshjen historike me Presidentin e SHBA, Donald Trump!
Sot, batonë e buzhalë marrin bajrakun jo vetëm të patriotit dhe arsyetojnë ndarjen e Kosovës për të cilën kishte ra dakord Hashim Thaçi, por, sapo hapi gojën edhe Edi Rama, u kuptua se kjo vetëm loja e Hashimit nuk ishte!
Nuk ishte rastësi as lufta që i shpallën Albin Kurtit dhe Vetëvendosjes në vitin 2020, por, nuk ishte asgjë më ndryshe nga Hashim Thaçi dhe PDK në vitin 2007, dhe trajtimi i Albinit me ardhjen e tij në pushtet!
Sot, të gjithëditurit, batonë e buzhalë me qershinë e tyre mbi tortën e krimit patriotik, Edi Rama, mendojnë se të gjithë tashmë e pranuan fabulën se na ishte një herë një Prokuror amerikan me emrin Clint Williamson që nuk gjeti dëshmi për trafikun e organeve në Kosovë dhe Shqipëri, që pretendonte hetimi i Dick Martit me shokë, dhe ndryshoj aktakuzën ndaj “disa udhëheqësve të kësaj strukture për krime të luftës ndaj qytetarëve serbë dhe jo shqiptarë gjatë periudhës së luftës”.
Por, jo, deri te Clinti na ishte Kryeprokuroja e Shqipërisë, Ina Rama, mikeshë e Edi Ramës, ajo që priti e përcjelli hetues të çuditshëm të UNMIK-ut si dhe patolog që “gjetën” dhe hetuan Shtëpinë e Verdhë! E për ti dhënë vulën e krimit nga mediat, u kujdesën për një medie serbe përmes së cilës do ti bënin jehonë një shtëpie në Mat, që fliste për krime monstruoze shqiptare!
Sot, angazhimi i batonëve e buzhalëve në krye me Edi Ramën është shqetësues kur procesi gjyqësor ka përfunduar dhe pritet dhënia e vendimit, ndërsa flitet për mesazhin që ka marrë ky grup i frikshëm se krerët e UÇK-së do të dënohen; Dhe, jo, pa arsye!
Këtë e dëshmon jo vetëm sjellja e këtij grupi kriminal i cili acarohet me të gjithë ata që nuk i binden dhe lëvizin nga linja, madje i sulmojnë edhe në emisione televizive ata që nuk i binden të vërtetës së tyre për lirinë që ka emër!
Ndonëse çdo manifestim si ky i sotmi “Drejtësi, jo politikë” dëshmon mendimin unik kombëtar për lirimin e çlirimtarëve, mbështetja nga batonë e buzhalë me në krye Edi Ramë, është një ogur i keq për Hashim Thaçin me shokë; Bazuar në të kaluarën, Hashim Thaç ishte fituar vetëm kur këtë grup e kishte kundërshtar!
Fatkeqësisht, kjo i ndodhi edhe Lirisë në Kosovë, emri i së cilës u bastardua vetëm kur u mbështet nga grupi i batonëve e buzhalëve me në krye Edi Ramën, dhe sot është mbivendosur ideja mbi këtë sensibilizim se kemi të bëjmë, thjeshtë me një Hipokrizi!
Sot, për shkak të pranisë së tyre kudo në jetën shoqërore, për fat të keq, duhet pranuar se jo vetëm për shkak të mungesës së kujtesës, ka shumë prej shqiptarëve që nuk e kuptojnë lirinë që e promovojnë batonë e buzhalë në krye me Edi Ramën, por, Albert Camus, e ka shpjeguar shumë kohë më parë:
Liria do të thotë para së gjithash të mos gënjesh. Pra, aty ku gënjeshtrat shumohen, paralajmerohet tirania ose vazhdon.
