Pasi e vënë me shpatulla pas murit, Berisha: Edi Rama po gjen zgjidhje në Beograd te Vuçiçi!

Pas ndërhyrjeve të fundit të fuqishme të komunitetit ndërkombëtar për të mbrojtur në Shqipëri rendin kushtetues dhe funksionimin e sistemit të drejtësisë si kushte për ecjen e mëtejshme drejt Bashkimit Evropian, Kryetari i Partisë Demokratike, Sali Berisha, tha sot se Edi Rama firmosi letrën famëkeqe me të damkosurin Aleksandër Vuçiç, duke i deklaruar BE-së se nuk më duheni ju, por më duhet Vuçiçi!

Duke folur para Grupit Parlamentar të PD, Kryetari i Partisë Demokratike bëri të ditur se Kryengritja e radhës do të mbahet më 12 Mars ndërsa ftoj qytetarët shqiptarë në të katër anët e Shqipërisë të bashkohen.

“Edi Rama ka vendosur të shkelë çdo ligj, çdo normë për të mbrojtur veten e tij.
Në asnjë rrethanë, ai nuk pranon të ulet para prokurorëve për aferat e panumërta korruptive që ka.
Kjo që zhvillohet është vetëm aparenca.
Natyrisht të dytë ky komb hajdute si Lubi Balluku nuk ka pasur në tërë historinë e tij. Por, nuk është çështja e Ballukut këtu. Këtu është çështja e Edi Ramës.

Pas ndërhyrjeve të fundit të fuqishme të komunitetit ndërkombëtar për të mbrojtur në Shqipëri rendin kushtetues, shtetin ligjor, ndarjen e pushteteve, funksionimin e sistemit të drejtësisë si kushtet e të gjitha kushteve për ecjen e mëtejshme drejt BE, të gjitha këto ranë në vesh të shurdhër.
Të gjitha këto, Edi Rama i shumëzon me interesin e tij personal dhe të pushtetit të tij.
Në kundërpërgjigje në rrafshin ndërkombëtar, ai firmosi letrën famëkeqe me të damkosurin Aleksandër Vuçiç, duke i deklaruar Europës, BE-së se nuk më duheni ju, por më duhet Vuçiçi.
Me Vuçiçin, gjatë këtyre muajve BE ka pasur, siç e keni ndjekur, një debat shumë të fortë dhe aktiv me të cilin i ka përcaktuar atij të gjitha qëndrimet, mospajtimet e BE me Beogradin e Vuçiçit.
Për më tepër, Aleksandër Vuçiç akuzohet si një nga organizatorët e safarit të Sarajevës, që ka organizuar gjahun e njerëzve në Sarajevë.
Një mashtrues i paskrupullt që betohej se nuk ka pasur automatik në dorë, në një kohë që videot e tij me automatik në dorë janë botërisht të njohura.
Dhe ky, në këto momente investohet me detyrim tek Vuçiç për t’i thënë se nuk je vetëm, jam edhe unë me ty. Por ky krejtësisht për qëllimet e veta, për qëllime se nuk do kurrsesi të ulet, të hetohet, të ulet në bankën e akuzës.
Pra, kemi të bëjmë me veprime in ekstremis të një njeriu që i mbështetur me shpatulla pas murit nga dhjetëra dosje, fakte, vetë dhe familjarisht, tani gjen zgjidhje në Beograd.
Tani propozon, nuk na duhet Europa, por Ballkani i Hapur. Dhe meqenëse Ballkani i Hapur ishte tregti e hapur me Serbinë pa asnjë lloj kriteri, tani na jepi edhe ju tregtinë ne.
Është formale kjo, se nuk mund t’i japë kurrë se Ballkani i hapur nënkupton i hapur me Serbinë, e cila ka traktate me ish-republikat sovjetike. Ndaj dhe prodhimet në Shqipëri, të gjitha bien për shkak të importeve që bën Serbia nga republikat ish-sovjetike.
Akt tjetër i tradhtisë kombëtare është ky, akti më i lartë pas tradhtisë që i ka bërë Kosovës është ky.
Sepse është investuar 33 vite në procesin e integrimit në BE dhe nuk ka qenë kjo një përpjekje e gabuar.
Jo, kjo ka qenë përpjekja më fisnike, investimi më i drejtë që kanë bërë shqiptarët,” tha Sali Berisha para Grupit Parlamentar të Partisë Demokratike duke shtuar se Edi Rama jo vetëm po nxjerr veten mbi ligjin, por po devijon edhe orientimin kryesor 33 vjeçar të shqiptarëve drejt Europës.

“Shqipëria, më shumë se çdo vend tjetër, duhet ta pranojmë, e ka pasur dhe e ka jetik procesin e integrimit. Kemi pasur një të shkuar tmerrësisht të dhimbshme. 500 vjet në Perandorinë Osmane.
Pastaj në diktaturën staliniste oruelliane.
Pra, de facto që nëse ka pasur një pjesë territori të Europës të shkëputur nga Europa për shekuj, ka qenë Shqipëria.
Nuk mund ta mohojmë këtë ne, çfarë do të thotë se është interes jetik për vendin të mbyllë procesin e integrimit. Ta mbyllë mbi bazë meritash, merita të zbatimit të ligjeve, Kushtetutës dhe standardeve dhe kritereve evropiane për qytetarët shqiptarë.
Pra, hyn në një stad të ri, hyn në një fazë të re veprimi kundër shqiptarëve i regjimit të Edi Ramës.
Jo vetëm veten e nxjerr mbi ligjin, por tani devijon edhe orientimin kryesor 33-vjeçar të shqiptarëve drejt Europës.
Dhe e bën këtë pa pyetur asnjë njeri. Pa pyetur asnjë institucion sepse ndjehet patron siç është i të gjithë infrastrukturës së narkoshtetit. Kjo dëshmon se jemi në një kohë shumë të vështirë, në një kohë kritike për vendin. Por, jemi edhe më të vendosur se kurrë që qytetarët shqiptarë t’i dalin zot vetes dhe të marrin fatet e tyre në dorë.
Ftoj çdo qytetar të përmbushë detyrimin e tij ndaj vetes, ndaj dinjitetit të tij, personalitetit të tij.
Nuk mund të pranojë kurrë një njeri i qytetëruar, një njeri i përgjegjshëm të qeveriset nga një padrino që asgjëson drejtësinë, që e vjedh dhe pastaj i thotë vjedhja nuk është krim. Është për qytetarin, por jo për shtetarin.”

Në fund, Kryetari i Partisë Demokratike duke bëri të ditur datën embajtjes së kryengritjes së radhës i ftoj qytetarët shqiptarë të bashkohen kundër kësaj organizate kriminale.

“U bëj thirrje ndërgjegjes së qytetarëve, kjo është betejë për ndërgjegjen e njeriut. Nuk ka ndodhur kurrë.
Asnjë pushtues nuk i ka lejuar vetes të bëjë një ligj të tillë, të shkelë çdo normë. Dhe tani nxori mburojën e Beogradit përpara. Tani thotë se nuk na duhet Brukseli, por na duhet Beogradi. Tani rikthehet në skenarë haptas antishqiptarë.
Nuk ka komb në botë që do duronte një njeri si ky, kurrë! Akti i fundit me Slobodanin e ri, Aleksandar Vuçiç, është një thirrje për atdhetarinë e çdo shqiptari kudo që ndodhet.
Ky ka shndërruar Shqipërinë në një vend tepër të rrezikshëm për të ardhmen e kombit duke përdorur pushtetin e tij.
Ndaj dhe duhet t’i përgjigjemi në mënyrën më të fuqishme dhe unë kam besim se do i përgjigjemi,” tha Kryetari i Partisë Demokratike, Sali Berisha, duke përfunduar me një ftesë për qytetarët shqiptarë:
“Data 12 është kryengritja e radhës. Ftoj qytetarët shqiptarë në të katër anët e Shqipërisë të bashkohemi kundër kreut të kësaj organizate kriminale për t’i dhënë përgjigjen e merituar për vjedhjet e tij dhe për tradhtinë e lartë kombëtare që i bën idealeve evropiane të popullit shqiptar. Ëndrrës evropiane të shqiptarëve për të zënë vendin e tyre të merituar në BE.”