Turqi, Ministria Mbrojtjes: Raketa balistike e lëshuar nga Irani u neutralizua nga NATO mbi hapësirën ajrore turke

Një raktë balistike e lëshuar nga Irani drejt hapësirës ajrore turke u kap dhe u neutralizua nga njësitë e mbrojtjes ajrore dhe raketore të NATO-s në Mesdheun Lindor sot, tha Ministria turke e Mbrojtjes Kombëtare.

Ministria tha përmes platformës turke të mediave sociale NSosyal se predha, e zbuluar pasi kaloi nëpër Irak dhe Siri, u parandalua me sukses nga mbrojtja ajrore, raporton Agjencia e lajmeve Anadolu. Fragmentet që ranë në rrethin Dortyol të provincës jugore Hatay i përkisnin interceptorit të përdorur për të shkatërruar kërcënimin, shtoi ministria.

“Vendosmëria dhe aftësia jonë për të siguruar sigurinë e vendit tonë dhe qytetarëve tanë janë në nivelin më të lartë,” tha ministria duke vënë në dukje se nuk pati viktima.

“Ndërsa Turqia mbështet stabilitetin dhe paqen rajonale, ajo është plotësisht e aftë të mbrojë sigurinë e territorit dhe qytetarëve të saj kundër çdo kërcënimi, pavarësisht nga origjina,” shprehet Ministria turke e Mbrojtjes.

Ministria theksoi se të gjitha masat e nevojshme për të mbrojtur tokën dhe hapësirën ajrore turke do të merren me vendosmëri dhe pa hezitim. “Ne rezervojmë të drejtën për t’iu përgjigjur çdo akti armiqësor të drejtuar ndaj vendit tonë”, tha ajo duke i paralajmëruar të gjitha palët kundër veprimeve që mund të përshkallëzojnë konfliktin rajonal.

Drejtori i Komunikimit të Turqisë, Burhanettin Duran konfirmoi në llogarinë në platformën turke NSosyal se vendosmëria dhe aftësia e Ankarasë për të mbrojtur vendin mbetet në nivelin më të lartë.

“Çdo hap për të mbrojtur tokën dhe hapësirën tonë ajrore do të ndërmerret pa hezitim”, tha Duran.

Turqia i përcjell shqetësimin Teheranit

Ministri i Jashtëm turk, Hakan Fidan sot i përcolli shqetësimin e Ankarasë homologut të tij iranian, Abbas Araghchi lidhur me raketën balistike të lëshuar nga Irani drejt hapësirës ajrore turke që u neutralizua, raporton Agjencia e lajmeve Anadolu.

Gjatë bisedës telefonike, Fidan i tha Araghchit se çdo hap që mund të çojë në përshkallëzimin e konfliktit duhet të shmanget, thanë burimet e Ministrisë së Jashtme turke.

Ndryshe, një raktë balistike e lëshuar nga Irani drejt hapësirës ajrore turke u interceptua dhe u neutralizua nga njësitë e mbrojtjes ajrore dhe raketore të NATO-s në Mesdheun Lindor, tha Ministria turke e Mbrojtjes./AA/