Shpërndarja Parlamentit/ LVV i drejtohet Kushtetueses, Presidentja takon liderët politik për datën e zgjedhjeve

Derisa Kryetarja e Grupit Parlamentar të Lëvizjes Vetëvendosje, Arbërie Nagavci, që sipas Dekretit të Presidentes Vjosa Osmani sot nuk e ka mandatin as si deputete dhe as si kreu i këtij Grupi, e ka vlerësuar akt të paprecedent Dekretin e Presidentes për shpërndarjen e legjislaturës së dhjetë të Parlamentit të Kosovës, pas këtij Dekreti, liderët politik iu përgjigjën ftesës së Presidentes Osmani për të diskutuar ditën e mbajtjes së zgjedhjeve.

“Shpërndarja e Kuvendit paraqet një akt të paprecedent i cili bie ndesh me rendit tonë kushtetues dhe ne do t’i drejtohemi Gjykatës Kushtetuese për këtë. Nuk ka asnjë arsye se pse duhej të ndodhte një akt i tillë sot në mëngjes,” tha Arbëri Nagavci duke fol dhe për kërkesën e qeverisë, që sot në orën 14:00 të mbahet një seancë parlamentare për shqyrtimin e marrëveshjeve parlamentare në vlerë prej 100 milionë eurove. “Në këtë seancë ishin paraparë ratifikimi i marrëveshjes së kredisë për projektin e rrugës me shpejtësi të lartë Prishtinë-Mitrovicë, marrëveshja e kredisë për investime për projektin energjia diellore në KEK, marrëveshja për rindërtim dhe zhvillim për impiantin e ujërave të zeza dhe marrëveshja e kredisë mes Kosovës dhe Bankës Evropiane për rindërtim dhe zhvillim për projektin e efiçiencës së energjisë në ndërtesa publike,” tha Nagavci thuase asgjë s’ka ndodhur ndërsa flet për një rrugë që nuk e mbyllën dot as për pesë vjet, të qartë se kishim të bëjmë me një rrugë që ka filluar të ndërtohet para 20 viteve.

“Duhet ta bëjmë të qartë për qytetarët, ne kemi qenë të vetëdijshëm se ka shumë palë e grupe të interesit, të cilave u ka penguar mbështetja e madhe qytetare për Lëvizjen Vetëvendosje dhe kryeministrin Kurti. Gjithsesi, ne kemi bërë gjithë çfarë ka qenë në dorën tonë për të shmangur edhe një palë zgjedhje,” tha Nagavci duke mbrojtur të pambrojtshmen, dështimin, e bindur se si subjekt politik janë marrë intensivisht me çështjen e zgjedhjes së presidentit, duke qenë se për këtë proces nevojiten mbi 80 deputetë.

“Si do të mund të arrinim një zgjidhje kur opozita as nuk propozoi kandidat, as nuk qëndroi në sallë, as nuk votoi për asnjë kandidat, e as nuk e konsideroi mundësinë e ndryshimit të kushtetues që presidenti të zgjidhet drejtpërdrejt nga qytetarët!”

E pyetur nëse do të marrin pjesë në takimin e thirrur nga Presidentja Vjosa Osmani me partitë politike për konsultim për datën e zgjedhjeve Arbëri Nagavci u shpreh:

“Nuk besoj që ka asnjë arsye të merret pjesë në një takim të tillë, për faktin e thjesht sepse siç e thamë ky është një veprim i cili jo vetëm që bie ndesh me Kushtetutën, por është edhe një veprim i nxituar dhe që nuk është në interes të vendit”.

Por, ndryshe nga lideri i Arbërie Nagavcit, liderët tjerë kishin arsye të përgjigjen në ftesën e presidentes Vjosa Osmani; Kryetari i PDK-së, Bedri Hamza, ai i LDK-së, Lumir Abdixhiku, AAK-së, Ramush Haradinaj dhe përfaqësues të partive të komuniteteve, të cilat e respektuan Dekretin.

Kryetari i Partisë Demokratike të Kosovës, Bedri Hamza, korrekt si në çdo takim për zgjedhjen e Presidentit me Albin Kurtin ndonëse u shpërfill, edhe pas takimit me Presidenten Vjosa Osmani ngeli korrekt, duke thënë se partia e tij do ta pranojë secilën datë që caktohet nga Presidentja, si dhe çdo Vendim që mund të dalë nga Gjykata Kushtetuese.

PDK do të respektojë çdo vendim që mund të marrë Gjykata Kushtetuese e Kosovës lidhur me çështjet që janë dërguar për shqyrtim në këtë institucion. Ai theksoi se partia e tij tashmë ka shprehur qëndrimin e saj dhe është në dijeni se disa shkresa janë dorëzuar në Gjykatën Kushtetuese, e cila do të vendosë nëse ato janë të pranueshme apo jo për trajtim.

“Ne ishim në takimin e ftuar nga presidentja e vendit, ku diskutuam edhe për mundësinë e datës së organizimit të zgjedhjeve të ardhshme. Unë e shpreh keqardhjen që kemi ardhur deri në këtë moment. Nuk ka pasur asnjë arsye, ka pasur më shumë se një alternativë. Përgjegjësia kryesore, normalisht, i bie partisë fituese, partisë më të madhe, sepse ka mundur t’i japë vendit president,” tha Bedi Hamza duke kujtuar historikun e zgjedhjes së presidentit dhe përpjekjet e partisë së tij për bashkëpunim.

“Ne e dimë në të kaluarën si ka shkuar zgjedhja e presidentit. Historikisht ka ndodhur me marrëveshje politike. Ne si parti demokratike kemi qenë mjaftueshëm konstruktivë dhe të hapur dhe kemi bërë të gjitha përpjekjet e nevojshme që vendit t’i jepet president. Unë nuk kam vendosur vija të kuqe asnjëherë në bashkëpunim me asnjë subjekt politik,” tha Hamza duke përsëritur edhe sot gatishmërinë e partisë për dialog dhe përfshirje në të gjitha takimet, me qëllim sigurimin e stabilitetit institucional.

“Kam folur që ka mundësi edhe për marrëveshje politike edhe para se të krijohet qeveria. Nuk e kemi pritur askënd te dera, mirëpo nuk kemi qenë refuzues as për këtë çështje. U jam përgjigjur të gjitha ftesave për takime, nuk kam shkuar në detaje se ku po mbahet takimi, kush po bën ftesa e kush çfarë po bën. Qëllimi ka qenë që vendit t’i japim president dhe të ketë stabilitet politik institucional dhe të mos vazhdohet me këto bllokada,” tha Kryetari i PDK, Bedri Hamza, duke e bërë të qartë në fund se çdo vendim i Gjykatës Kushtetuese deri më tani është respektuar dhe zbatuar nga PDK dhe kështu do të veprohet edhe në këtë rast, si dhe beson se që Presidentja Vjosa Osmani i ka analizuar mirë veprimet e saj dhe ka vepruar në përputhje me detyrimet dhe përgjegjësitë kushtetuese.

Kryetari në dorëheqje i AAK-së, Ramush Haradinaj, pas takimit tha me presidenten e Kosovës, Vjosa Osmani, se mospjesëmarrja e Lëvizjes Vetëvendosje la një shije të keqe.

“Një shije e keqe ishte mospjesëmarrja e Vetëvendosjes dhe partnerëve të saj qeverisës, ndërsa edhe Lista Serbe mungoi në takim, është e pakuptimet mos pjesëmarrja e tyre,” tha Ramush Haradinaj duke shtuar se 5, 12 dhe 19 prilli janë si opsione për mbajtjen e zgjedhjeve të reja, por mund të ketë edhe datë tjetër.

“Adresimi në Gjykatë Kushtetuese është një fyerje në vete, tallje, hajgare me proceset. Ata më së miri e din që afati 30-ditor është i tillë e kanë ditur me kohë, kanë bërë hajgare, mënyra se si kanë thirr seanca dje, është vërtetë gabim prej anës tyre. Askush nuk i ka faj VV-së për sjelljen e tyre dhe ato që ia kanë sjellur vendit, kjo situatë është rezultat i tyre. Është dashur të vinë ne këtë takim dhe ti thonë pikëpamjet qofshin edhe të kundërta,” tha Ramush Haradinaj duke përfunduar:

“Sa i përket datave janë opsion datat prej 5, 12 dhe 19 prill. Mund të ketë edhe ndonjë datë tjetër varësisht prej zhvillimeve, ne nuk kemi datë të preferuar për shkak se e kuptojmë se jemi në auto-pilot, nuk ka më askush kompetenca, përveç Kushtetutës, dhomave kushtetuese dhe afateve kushtetuese dhe ne e respektojmë cilën do datë nga këto data.”

Ndryshe, pas dështimit të Albin Kurtit me Lëvizjen e tij “Vetëvendosje” që të zgjedh Presidentin e ri deri në ditën e fundit kushtetuese, 5 Mars 2026, sot, Presidentja e Kosovës, Vjosa Osmani, ka dekretuar shpërndarjen e Parlamentit të Kosovës duke e çuar vendin drejt zgjedhjeve të reja.