Apeli i GJKKO lë në fuqi pezullimin nga detyra të Belinda Ballukut
Gjykata e Posaçme e Apelit për Korrupsionin dhe Krimin e Organizuar, Apeli i GJKKO, ka lënë në fuqi pezullimin e nga detyra e Zv/Kryeministres dhe ministres së Infrastrukturës dhe Energjisë, Belinda Balluku, pas ankimimit që bëri e pandehura në Apel kundër vendimit të GJKKO, e cila e pezulloi nga detyra, teksa u akuzua nga SPAK për shkelje të barazisë në tendera.
“Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtare Miliana Muça, pas pezullimit të shqyrtimit gjyqësor të çështjes nr. 86 akti, datë 11.12.2025 regjistrimi, përsa i përket shqyrtimit të ankimit të ankueses B.B. ndaj vendimeve nr. 118, datë 19.11.2025 dhe nr. 120, datë 22.11.2025 të Gjykatës së Posaçme të Shkallës së Parë për Korrupsionin dhe Krimin e Organizuar, për pjesën që ajo ka kundërshtuar caktimin dhe vazhdimin e masës së sigurimit personal me karakter ndalues “Pezullimi i ushtrimit të një detyre a shërbimi publik”, të parashikuar nga neni 242 i K.Pr.Penale, sot më datë 09.03.2026 disponoi për çështjen penale nr. 5 akti, datë 10.02.2026 regjistrimi, si vijon:
1.Miratimin e vendimit nr. 18, datë 19.11.2025 dhe të vendimit nr. 120, datë 22.11.2025 të Gjykatës së Posaçme të Shkallës së Parë për Korrupsionin dhe Krimin e Organizuar, në lidhje me ankimin e ankueses B.B edhe për sa i përket caktimit dhe vazhdimit të masës së sigurimit personal me karakter ndalues “Pezullimi i ushtrimit të një detyre a shërbimi publik” (pezullimi nga detyra me funksione të larta shtetërore si Zv.Kryeministër i Republikës së Shqipërisë dhe Ministër i Infrastrukturës dhe Energjisë), të parashikuar nga neni 242 i K.Pr. Penale.”, njofton gjykata.
Disa javë më parë, Apeli i Posaçëm nuk pranoi shqyrtimin e ankimit, derisa të shprehej Gjykata Kushtetuese. Pasi kjo e fundit la në fuqi pezullimin e vendimit, duke rrëzuar pretendimet e kryeministrit Rama, Apeli i Posaçëm vendosi ta rihapë sërish.
Ndërkohë, Belinda Balluku është shkarkuar nga dy funksionet që mbante në qeveri, atë të zv.kryeministres dhe të ministres së Infrastrukturës dhe Energjisë.
Në kohë që Gjykata e Posaçme e Apelit për Korrupsionin dhe Krimin e Organizuar mori Vendim për të lënë në fuqi pezullimin nga detyra e Zv/Kryeministres dhe ministres së Infrastrukturës dhe Energjisë, Belinda Balluku, teksa u akuzua nga SPAK për shkelje të barazisë në tendera, Ish-Ministri i Drejtësisë, Ulsim Manja, si relator në Këshillin e Mandateve dhe Imunitetit duke kundërshtuar dhënien e autorizimit pë arrestimin e të pandehurës Belinda Balluku, para Grupit Parlamentar të Partisë Socialiste mundohet ta bind miletin se “shkelja e barazisë në tendera apo ankande publike”, nuk klasifikohet si korrupsion, por si një vepër me natyrë administrativo-penale dhe konkludon:
“Nuk ka vend për dhënien e autorizimit për arrestimin e Belinda Ballukut!”
