Lëvizja Vetëvendosje dërgon në Gjykatën Kushtetuese dekretin e Presidentes Osmani

Partia në pushtet Lëvizja Vetëvendosje, është ankuar zyrtarisht në Gjykatën Kushtetuese kundër dekretit të Presidentes Vjosa Osmani për shpërndarjen e Parlamentit të Kosovës, njoftoi sot Kryetarja e Grupit Parlamentar të LVV, Arbërie Nagavci.

Përmes një postimi në rrjetin social Facebook, Arbërie Nagavci tha se krahas kërkesës për vlerësimin e kushtetutshmërisë së dekretit, i kanë kërkuar Gjykatës ta pezullojë përkohësisht dekretin e presidentes deri në nxjerrjen e aktgjykimit përfundimtar.

“Është e qartë se Presidentja e Republikës nuk ka të drejtë diskrecionale për të ndërhyrë në funksionimin e pushtetit legjislativ, e aq më pak për të ndërmarrë veprime që çojnë në shpërndarjen e Kuvendit,” tha Nagavci.

Presidentja Osmani e nxori më 6 mars dekretin për ta shpërndarë Parlamentin, gjë që do ta çonte vendin e zgjedhje të parakohshme parlamentare.

Ndërsa për datën e zgjedhjeve, Presidentja ende nuk e ka firmosur dekretin sepse është në pritje të vendimit të Kushtetueses, tha sot këshilltari i saj për media, Bekim Kupina.

Ajo e ka arsyetuar këtë vendim, duke thënë se 5 marsi ka qenë afati i fundit për zgjedhjen e presidentit të ri të Kosovës – meqë mandati i saj përfundon më 4 prill – por që deputetët kanë dështuar t’i përmbushin afatet ligjore.

Arbërie Nagavci argumentoi se roli i presidentit në këtë proces është strikt i kushtëzuar dhe aktivizohet vetëm në rrethanat e përcaktuara qartë nga Kushtetuta e Republikës së Kosovës.

“Përpjekjet për të ushtruar kompetenca që nuk janë të përcaktuara qartë me Kushtetutë jo vetëm që dëmtojnë rendin kushtetues, por rrezikojnë edhe vetë funksionimin demokratik të institucioneve,” tha Nagavci.

Ndërkohë po sot, Kryetarja e Parlamentit, Albulena Haxhiu, tha se organi ligjvënës nuk mund ta vazhdojë punon derisa Kushtetuesja të nxjerrë një vendim.

Partia në pushtet thirret në nene të tjera të Kushtetutës dhe beson që dekreti nuk ka bazë, meqë procedurat për zgjedhjen e presidentit i ka nisur më 5 mars dhe ka afat prej 60 ditësh për ta finalizuar procesin.

Presidentja Osmani, në anën tjetër, ngul këmbë se afati 60 ditor do të duhej të shfrytëzohej para 5 marsit dhe ajo e mbajti menjëherë një takim partitë politike për të folur për datën e zgjedhje të parakohshme.

Në takim morën pjesë kryetarë të partive opozitare, Partisë Demokratike të Kosovës, Lidhjes Demokratike të Kosovës dhe Aleancës për Ardhmërinë e Kosovës, por jo edhe partia e kryeministrit Albin Kurti.

Në seancën e 5 marsit, Lëvizja Vetëvendosje i paraqiti dy kandidatë për president: Glauk Konjufcën dhe Fatmire Kollçaku-Mullhaxhën.

Seanca u ndërprerë në mungesë të kuorumit, pasi ishte braktisur nga partitë opozitare.

Presidenti i Kosovës zgjidhet me dy të tretat e votave në dy raundet e para dhe me 61 vota në raundin e tretë, por nevojiten 80 deputetë prezentë në sallë që seanca të mundë të mbahet.

Për partitë opozitare, dy figurat e prezantuara nga LVV kanë qenë të papranueshme dhe ato kanë ngulur këmbë në marrëveshje politike ose të prezantohet një figurë konsensuale.

Palët kanë zhvilluar disa runde bisedimesh në javët e fundit, mirëpo nuk kanë arritur pajtueshmëri.

Vetë Presidentja Osmani e ka synuar edhe një mandat të dytë, mirëpo emrin e saj nuk e ka propozuar askush. Për LVV-në ajo nuk i ka pasur votat e nevojshme, ndërsa për partitë tjera ajo nuk e ka personifikuar unitetin e nevojshëm që i duhet figurës së presidentit./RFE/