Burg, burg, burg

nga Lutfi Dervishi

Në vitin 2018, një qytetar nga Pogradeci u ekstradua nga Greqia pasi ishte shpallur në kërkim ndërkombëtar nga Interpol Tirana. Arsyeja, një detyrim prej rreth 200 mijë lekësh të vjetra për energjinë elektrike.

Dy agjentë të Interpol Tirana udhëtuan për ta marrë personin në kërkim në Athinë. U paguan biletat e avionit, hoteli, dietat dhe më pas edhe bileta e kthimit për të ekstraduarin.

Kostoja totale e operacionit arriti rreth 700 mijë lekë të vjetra.

Pra, shteti shpenzoi 500 mijë lekë më shumë se vetë dëmi për të cilin personi ishte në kërkim.

Ky nuk është rast i vetme dhe kjo nuk ishte një periudhë e zakonshme. Në atë kohë aksionet kundër informalitetit dhe shkeljeve të vogla moren një dimension spektakolar. Në burg përfundonin edhe njerëz që kapeshin duke lëvizur me “papaq”, motoçikletat e vogla pa dokumente.

Madje, sipas një praktike që u bë temë debatesh në atë kohë, nëse ndonjë gjyqtar nuk vendoste masën e paraburgimit, ministri i Brendshëm lexonte publikisht listën emërore të gjyqtarëve që nuk kishin dhënë vendimin me burg.

Rasti i pogradecarit mbetet një shembull i filozofisë “burg, burg, burg”…

Shteti ishte gati të shpenzonte më shumë para sesa vetë dëmi që kërkonte të rikuperonte.