Struktura e re e Policisë së Shtetit/ Xhafaj-Veliu çmontojnë skemën Tahiri-Çako
Struktura e re e Policisë së Shtetit/ Xhafaj-Veliu çmontojnë skemën Tahiri-Çako
Ministri i Brendshëm, Fatmir Xhafaj, po ndryshon skemën e ndërtuar nga paraardhësi i tij, Sajmir Tahiri, në Policinë e Shtetit.
Policia e Shtetit sot ka bërë publike edhe një plan për ndryshimin e strukturës së Drejtorive të Policive në Qarqe dhe rikthimin siç ka qenë para se socialistët të merrnin pushetin në vitin 2013.
Pasi u bë ministër i Brendshëm, Tahiri ndryshoi thuajse gjithë strukturën e Policisë së Shtetit, duke ndërtuar një tjetër strukturë, të cilën sot e ka çmontuar Fatmir Xhafaj.
Sot është bërë e ditur se Drejtori i Përgjithshëm i Policisë së Shtetit, Ardi Veliu, ka firmosur urdhrin për ndryshimin e strukturave në drejtoritë vendore te policisë në qarqe.
Në bazë të platformës se policimit dhe sigurisë ne komunitet këto drejtori do të ndryshojnë sektorët e tyre. Ky ndryshim pritet të sjelle lëvizje në polici si edhe shkarkime për shkak të shkurtimeve të pozicionit.
Ky projekt u pilotua fillimisht në drejtorinë e Policisë së Elbasanit.
Sipas strukturës se re çdo drejtori vendore do te këtë drejtor dhe 2 nëndrejtorë ku njëri do të mbulojë hetimin e krimeve ndërsa tjetri çështjet e rendit dhe sigurisë publike.
Disa prej sektorëve ekzistues do të shkrihen ose do të bashkohen në një sektor të vetëm në mënyrë të tillë që të ulet numri i punonjësve në nivel drejtues.
Do të shkrihen 3 sektorët e hetimit dhe krijohet sektori i vetëm që do të mbuloje çështjet e drogës trafiqeve te paligjshme dhe krimit ekonomik që më parë ishin të ndarë.
Sektori i Rendit do të ketë Sallën Operative Sektorin e Rendit dhe atë të Qarkullimit rrugor. Do të zgjerohet kompetenca e komisariateve të cilët do të merren edhe me veprën penale të vrasjes e cila më parë u kalonte drejtorive.
Territori i një komisariati do të ndahet në zona policore ku do të rritet roli i inspektorit të zonës.
Ndryshime do të ketë dhe policinë Rrugore, e cili do të ketë në varësi seksionet e policisë rrugore.
Ato nuk do kenë varësi nga komisariatet siç ishte më parë.
