Dosja “Partizani”, Kryeministri Edi Rama thirret nga GJKKO si dëshmitar

Kryeministri Edi Rama do të thirret në Gjykatën e Posaçme Antikorrupsion si dëshmitar, ku do të pyetet për dosjen “Partizani”.

Pas nisjes së seancës sot në GJKKO në ngarkim të kreut të PD, Sali Berisha dhe bashkëpunëtorëve të tjerë në çështjen “Partizani”, Gjykata e Posaçme ka pranuar që Edi Rama të pyetet nga vetë Berisha dhe dhëndri i tij, Jamarbër Malltezi, ndaj të cilit ka masë “detyrim paraqitje” për këtë dosje.

Ndryshe, Kryeministri Edi Rama do të merret në pyetje për çështjen e privatizimit, për kohën kur ai ishte Kryetar i Bashkisë Tiranë.

Ishte Kryetari i PD, Sali Berisha, i cili kërkoi që Edi Rama të thirret si dëshmitar në proces, gjë që nuk u kundërshtua nga SPAK, ndërsa GJKKO vendosi për thirrjen e tij.

Dosja “Partizani” kaloi për gjykim më 19 maj 2025. SPAK ka ngritur akuzat e korrupsionit pasiv të zyrtarëve të lartë ndaj Ish-Kryeministrit, Sali Berisha. Dhëndri i tij, Jamarbër Malltezi është nën akuzë për korrupsion, por edhe për pastrim parash.

Sipas SPAK, ai ka përfituar të ardhura në vlerën e 5.4 milionë euro nga një biznes ndërtimi në mënyrë të parregullt falë vendimeve të qeverisë të marra nga vjehrri i tij.