Ekspertët tregojnë çfarë të thoni kur dikush ju pyet për pagën

Bisedat për pagën po bëhen gjithnjë e më pak tabu, sidomos mes brezave më të rinj, por ekspertët e etikës thonë se mënyra si shtrohet kjo çështje mbetet thelbësore.

Sipas tyre, pyetja për pagën nuk pritet mirë kur bëhet thjesht nga kurioziteti apo për thashetheme. Por kur qëllimi është të kuptohet më mirë tregu i punës, të krahasohen nivelet e pagesave apo të negociohet paga personale, ajo mund të marrë një tjetër kuptim.

Një sondazh i vitit 2025 nga KickResume tregon se 39% e punonjësve të Brezit Z thonë se paga diskutohet hapur në vendin e punës, kundrejt 30% të mijëvjeçarëve dhe 22% të Brezit X.

Të dhënat sugjerojnë se transparenca për pagën po fiton terren, veçanërisht mes të rinjve.

Thomas Farley, ekspert i etikës, vlerëson se për shumë të rinj, sidomos për Brezin Z, ideja që paga është një temë e papërshtatshme për diskutim është gjithnjë e më e huaj. Sipas tij, ata besojnë më shumë te transparenca dhe nuk shohin arsye pse niveli i pagesës duhet të mbetet sekret.

Megjithatë, ekspertët paralajmërojnë se motivi pas pyetjes mbetet vendimtar.

Nëse dikush pyet vetëm për kuriozitet, pyetja mund të shihet si e papërshtatshme. Ndërsa nëse bëhet për të kuptuar më mirë pozicionimin në treg apo për të vlerësuar nëse paga personale është konkurruese, atëherë ajo mund të shtrohet në mënyrë më të kujdesshme.

Këshilla e tyre është që, para se t’i drejtoheni një kolegu apo një njohjeje, të bëni më parë kërkimet tuaja përmes faqeve të karrierës, platformave me të dhëna për pagat apo shpalljeve të punës ku publikohen intervalet e pagesave.

Në rast se pyetja mbetet e nevojshme, ajo duhet të formulohet me takt, duke i lënë tjetrit hapësirën për të mos dhënë përgjigje.

Një mënyrë më e pranueshme, sipas ekspertëve, është të kërkohet një interval page dhe jo një shumë e saktë. Kjo e bën bisedën më pak të sikletshme dhe më të dobishme për të dyja palët.

Nga ana tjetër, edhe refuzimi për të folur për pagën konsiderohet plotësisht i pranueshëm.

Ekspertët theksojnë se kushdo ka të drejtë të vendosë kufij të qartë për financat personale.

Një përgjigje e thjeshtë se nuk ndihet rehat të flasë për këtë temë mjafton. Për ata që duan të ndihmojnë pa hyrë në hollësi, sugjerohet të japin vetëm një interval të përafërt dhe jo shumën e saktë. /CNBC/ Monitor/