Skadon afati që i jep President Trump 60 ditë për të nisur luftë pa miratimin e Kongresit
Sot skadon afati i një ligji nga epoka e Luftës së Vietnamit që kufizon veprimet e një presidenti në kohë lufte në 60 ditë, pas së cilës ai duhet të kërkojë miratimin e Kongresit për të vazhduar konfliktin. Sipas Aktit të Pushteteve të Luftës të vitit 1973, presidentët kanë 60 ditë për të ndërmarrë veprime ushtarake në përgjigje të një kërcënimi ose sulmi të menjëhershëm ndaj Shteteve të Bashkuara pa miratimin e Kongresit.
Shtetet e Bashkuara dhe Izraeli sulmuan Iranin më 28 shkurt dhe Presidenti Donald Trump njoftoi zyrtarisht Kongresin 48 orë më vonë, duke aktivizurar afatin i cili skadon më 1 maj.
Sekretari i Luftës i SHBA-së, Pete Hegseth, tha në dëshminë e tij para Senatit të enjten se armëpushimi dy-javor e kishte vonuar afatin dhe masa e vitit 1973 i jep presidentit një zgjatje prej 30 ditësh për të siguruar që trupat janë të sigurta gjatë tërheqjes, raporton CNN.
Armëpushimi i brishtë
Disa demokratë në Kongres po paralajmërojnë se afati 60 ditor nuk duhej të ishte zbatuar kurrë sepse nuk kishte kërcënim të menjëhershëm nga Irani, shtuan mediat amerikane.
Një zyrtar i paidentifikuar amerikan tha për Agjencinë e lajmeve Reuters se armëpushimi dyjavor, i cili filloi në fillim të prillit, ishte për qëllim të afatit të ardhshëm.
“Armiqësitë që filluan të shtunën, më 28 shkurt, konsiderohen të kenë mbaruar”, tha zyrtari, duke shpjeguar qëndrimin e administratës Trump. Ai shtoi se nuk ka pasur shkëmbim zjarri midis forcave amerikane dhe Iranit që kur armëpushimi i brishtë filloi më shumë se tre javë më parë.
Analistët dhe zyrtarët e Kongresit janë shprehur më parë se presin që Presidenti Trump të njoftojë Kongresin për një zgjatje 30 ditore ose thjesht të injorojë afatin, duke argumentuar se armëpushimi i ka dhënë fund konfliktit.
