Lufta dhe kriza e karburanteve prek makinat, bien regjistrimet në Prill

Pasi arritën rekordin historik në janar-mars, regjistrimet për herë të parë të automjeteve kanë shënuar rënie në muajin prill, sipas të dhënave që janë bërë publike nga Drejtoria e Përgjithshme e Shërbimit të Transportit Rrugor, DPSHTRR.

Gjatë muajit prill u regjistruan në vend 8.707 automjete, me një tkurrje të lehtë prej 2 për qind në krahasim me të njëjtën periudhë të një viti më parë.

Për periudhën janar-prill në rrugët e vendit janë shtuar gjithsej edhe 30.8 mijë mjete, ose 5.2 për qind më shumë se e njëjta periudhë, të ndikuara nga ecuria e mirë në tre muajt e parë të vitit, me zgjerim prej 8.4 për qind.

Aktorët e tregut pohojnë se frenimi i prillit lidhet me disa faktorë, ku më kryesori ka të bëjë me situatën e krijuar në Ngushticën e Hormuzit, që ka ngadalësuar dhe rritur koston e transportit të mjeteve. Vitet e fundit, pjesa më e madhe e makinave në Shqipëri po importohen nga Korea e Jugut dhe së fundmi nga Kina. Për 4 mujorin, nga këto shtete erdhën 13 mijë mjete, ose 42 për qind e totalit, 7.414 prej të cilave nga Korea e Jugut dhe 5.632 nga Kina.

Mjetet e importuara nga Korea e Jugut dhe Kina kalonin nga ngushtica e Hormuzit, por tani, për shkak të konfliktit në Lindjen e Mesme ndjekin rrugë të tjera, që ka rritur me deri në 30 për qind kostot e transportit si rrjedhojë edhe çmimet, duke frenuar si kërkesën ashtu dhe kohën që i duhet një mjeti të arrijë në Shqipëri.

Ndryshimi i rrugëve të transportit ka ndikuar dhe në frenimin e makinave elektrike. Ndërsa në mars u regjistruan për herë të parë 1252 makina elektrike, një nivel rekord historik, në prill regjistrimet ranë në 1191, ndonëse interesi për blerjen e tyre është shtuar, pas rritjes së fortë të çmimeve të karburantit, me naftën që i ka kaluar 200 lekë për litër dhe mbi të gjitha është ndër më të shtrenjtat në Europë, për shkak të barrës së lartë të taksave, që zënë gati gjysmën e çmimit.

Megjithatë, makinat me naftë vijojnë të jenë të preferuarat për përdoruesit shqiptarë të mjeteve, me 53% të regjistrimeve për herë të parë për janar-mars, që përdornin këtë lloj karburanti, ose 16.3 mijë mjete.

Në katër muajt e parë janë regjistruar rreth 4.1 mijë mjete vetëm elektrike, ose 13.5 për qind të totalit. Nga këto, 2.830 janë të markës kineze BYD, të ndjekura nga Volkswagen, me 221 të tilla. Në vend kanë filluar të hyjnë dhe marka të tjera kineze elektrike, si Fang Cheng Bao, me 100 regjistrime për herë të parë dhe Wuling, me 96.

Totali i mjeteve që qarkullojnë në vend po rritet vazhdimisht, duke arritur në fund të muajit prill në gati 1.08 milionë, nga të cilat 80.7% ishin autovetura. Kryesimin vijon ta mbajë Mercedes Benz me 17.9 për qind të totalit, e ndjekur nga Volkswagen me 16.7 për qind, Ford 7.3 për qind, Daimler Chrysler 7.2 për qind, Audi 6.3 për qind, Toyota 4.2 për qind, Opel 3.5 për qind, Fiat 3.3 për qind. Pesha e markave të tjera është më e ulët se 3 për qind.

Marka kineze Byd po rritet me shpejtësi, me 5,524 të tilla në qarkullim deri në fund të prillit, ose 0.5 për qind të totalit. Më shumë se gjysma e tyre ose 51 për qind u regjistruan vetëm në katër muajt e parë të këtij viti./Monitor/