Autoriteti i Dosjeve promovon Sigurimin e Shtetit
nga Agim Popoci
Nuk do të ishte korrekte 10 vjet më parë që të paragjykohej Autoriteti për Informimin mbi Dosjet e Ish-Sigurimit të Shtetit kur u ngrit zyrtarisht dhe nisi punën praktike, pasi ishte themeluar 4 majin e vitit 2015; As të lihet e vetme drejtuesja e këtij institucioni, kur 7 vjet më parë u sulmua nga partia në pushtet duke u quajtur “plehrë”, pasi Autoriteti i Dosjeve konfirmoi se prokurori Bujar Sheshi ishte bashkëpunëtor i Sigurimit të Shtetit ndërsa kishte arritur në majat e Prokurorisë së Shtetit, Këshillit të Lartë të Prokurorisë!
Por, sot, çdo shqiptar duhet ta ketë për turp nëse hesht kur sheh se 10 vjet pas krijimit të këtij institucioni, Sigurimi i Shtetit është rikthyer në institucionet publike!
Dhe jo vetëm kaq!
Ndërkohë, gjatë këtij 10 vjeçari u krijua dhe një institucion në shërbim të partisë kriminale që krijoi Sigurimin e Shtetit dhe këtë Autoritet, Patronazhistët, që kryesisht janë pasardhës të bashkëpunëtorëve të Sigurimit!
Natyrisht do ishte jokorrekte të thuhet sot se Autoriteti i Dosjeve është fajtori i vetëm i rikthimit të Sigurimit në institucionet publike, por, që është faktori thelbësor kjo nuk diskutohet!
Këtë e konfirmon edhe Raporti i fundit për vitin 2025 ose më saktë Problematikat që janë hasur gjatë punës së këtij institucioni si dhe ankesa kapitale e cila vetëm sa ka promovuar Sigurimin e Shtetit, vijimi i shmangies së procesit të verifikimit të figurës së kandidatëve nga subjektet politike, pavarësisht detyrimeve që burojnë nga ligji për hapjen e dosjeve dhe transparencën në jetën publike!
Pse zotimi i të Përndjekurve Politikë se nuk do të hakmerren ndaj kriminelëve të Sigurimit të Shtetit dhe gjithë atij onturazhi komunist që u bëri jetën ferr, u jetësua, por, çuditërisht u keqpërdor nga këta kriminelë të cilët me kthimin e partisë së tyre në pushtet iu kthyen zanatit të vjetër, ndërkohë u themeluan dy institucione që presupozohej se do ta shmangnin këtë rikthim, si Instituti i Studimeve për Krimet dhe Pasojat e Komunizmit dhe Autoriteti për Informimin mbi Dosjet e Ish-Sigurimit të Shtetit, sot, nuk është më enigmë!
Pjesën e luanit të këtij dështimi dhe turpi të madh kombëtar natyrisht se e ka Autoriteti i Dosjeve për faktin se ka për detyrë Verifikimin e Figurave!
Nuk është e gabuar ndonëse çdo Raport Vjetor u përdor politikisht, kur Autoriteti për Informimin mbi Dosjet e Ish-Sigurimit të Shtetit, e evidenton si shqetësim faktin se gjatë vitit 2025 vetëm 6 kandidatë kërkuan verifikim me iniciativë personale, megjithëse institucioni kishte njoftuar zyrtarisht 53 subjekte politike, por, nëse Spiuni i Sigurimit nuk shkon te Autoriteti i Dosjeve, pse Autoriteti nuk shkon te Spiuni?!
Ose, pse nuk evidentohet si problematikë të ndryshoj strategjia e Verifikimit të Figurave ndërkohë që institucionet publike, në veçanti ato të sigurisë, sot janë mbushur me bashkëpunëtor të Sigurimit, por, vetëm shënjestrohet posti i deputetit, ndonëse me politikën e Edi Ramës i gjithë Parlamenti është zhvlerësuar dhe është vënë në shërbim të krimit!
Pas dëshmisë publike të Zv/Kryeministrit në kërkim nga SPAK, Arben Ahmetaj, ish-dora e djathtë e Kryeministrit, se Edi Rama ishte shprehur se po lejon kanabizimin e Shqipërisë që të rritet mirëqenia shqiptare, çdo institucion duke përfshirë këtu dhe Autoritetin e Dosjeve duhej të alarmohej që vendi po drejtohej nga një mendje kriminale!
Këtu dhe Autoriteti do të gjente përgjigjen pse duhet të bënte ndryshime në Raportimet Vjetore që nuk kanë lidhje me realitetin, dhe pse është e domosdoshme të bëhet Verifikimi i Figurave të institucioneve financiare që janë dhe burimi i financimit dhe ngritjes së krimit brenda Parlamentit të Shqipërisë!
Pse Autoriteti i Dosjeve nuk është shqetësuar për faktin se bosët e firmave piramidale ishin oficer të Sigurimit të Shtetit, deri dje mund të quhej edhe paaftësi, por, sot, kur Autoriteti pret që Spiuni i Sigurimit t’i troket në derë sepse i është mbushur mendja të bëhet deputet, nuk ka Zot që e ndihmon duke përfshirë këtu dhe problematikat që ai rendit në Raportin 2025; Që janë turpi dhe faqja e zezë e këtij Autoriteti!
Nëse Autoriteti i Dosjeve mendon se jo një deputet, por, dhe krerët e Bankës së Shqipërisë, Autoritetit të Mbikëqyrjes Financiare, Inspektoratit të Deklarimit dhe Kontrollit të Pasurive dhe Konfliktit të Interesave, Kontrollit të Lartë të Shtetit, Entit Rregullator të Energjisë dhe Autoritetit të Konkurrencës, nuk janë komplementar në funksionimin e tyre me 12 banka dhe 1 degë e bankës së huaj, me kapital të huaj dhe vendas, që aktualisht operojnë në Shqipëri, 22 subjektet financiare jo banka dhe mikrokreditë, 4 institucioneve të pagesave dhe 361 agjentë të institucioneve të pagesave, që kryesisht drejtohen nga njerëz të Sigurimit të Shtetit, atëherë Autoriteti nuk mund të cilësohet më si dështim, por, promotor i rikthimit të Sigurimit në institucionet shqiptare!
Dhe, si i tillë, Autoriteti i Dosjeve mund të vazhdoj ti përdor dhe të përdoret me dosjet që i janë dhënë në dispozicion duke menduar se mund ta shes punën që bënë duke e quajtur verifikim të figurës së Presidentit të Republikës dhe çdo personi tjetër të dekretuar nga Presidenti apo i zgjedhur nga Parlamenti, kandidatët për deputetë, kryetarë bashkish dhe kryetarë këshilli qarku, si dhe kandidatët që propozohen për dhënie dekoratash, tituj nderi, medalje dhe titujt vendorë të nderit; Por, kjo tashmë edhe nuk ka rëndësi sepse Sigurimi i Shtetit, kapacitetet që kishte për ti rikthyer i ka rikthyer në institucionet publike, arsim, kulturë e shëndetësi, dhe pak rëndësi ka se çfarë figuron në Raportin e radhës së Autoritetit të Dosjeve, përderisa në pushtet janë ata që janë rritur duke dëgjuar gjatë çdo vakti në gjirin familjar, se sa intelektualë shqiptarë – kundërshtar të komunizmit, kanë vrarë prindërit e tyre me Sigurimin, sa nuk i kanë falur nga varja në litar, ose në rastin më të mirë, sa i kanë degdisur në internim!
