Shqiptarët, ndër më të lodhurit emocionalisht në vendin e punës në Europë

Raporti i fundit i Komisionit Europian mbi kushtet e punës dhe punën e qëndrueshme tregon se 17 për qind e punonjësve shqiptarë kanë deklaruar se ndihen “gjithmonë” ose “shumicën e kohës” të lodhur emocionalisht nga puna e tyre.

Kjo përqindje është ndër dhjetë të lartat në Europë dhe mbi mesataren e Bashkimit Europian prej 13 për qind.

Në Ballkan, rekordin e mban Kosova, me 29 për qind që janë të lodhur emocionalisht gjithmonë ose shumicën e kohës, e dyta më e lartë në Europë, pas Qipros, Mali i Zi me 26 për qind, Maqedonia e Veriut 21 për qind. Serbia me17 për qind , ndërsa nivelin më të ulët të lodhjes emocionale në punë e ka Bosnje Hercegovina me 13 për qind.

Të dhënat janë publikuar nga raporti i fundit i Komisionit Europian për anketimin mbi kushtet e punës dhe punën e qëndrueshme, që realizohet një herë në 5 vjet dhe u publikua në prill.

Anketimi mat dhe lodhjen fizike, ku punonjësit shqiptarë duket se ankohen më pak, në raport me vendet e tjera të Europës, me 26% që janë gjithmonë ose vazhdimisht të lodhur fizikisht.

Në këtë nivel, Shqipëria është ndër 10 të fundit e Europës, më e ulët se mesatarja e BE-së prej 28 për qind, dhe shumë larg niveleve të Malit të Zi me 38 për qind, Maqedonisë së Veriut me 35 për qind, Kosovës 34 për qind, Serbisë 30 për qind, Bosnjes 29 për qind.

Anketa
Anketa pyeti të anketuarit në Europë nëse ndiheshin fizikisht të rraskapitur në fund të ditës së punës dhe nëse puna i linte emocionalisht të lodhur. Këto konsiderohen disa nga simptomat e “burnout”, rraskapitje fizike dhe emocionale nga puna, që shfaqet pas një periudhe të gjatë stresi dhe ngarkese të lartë.

Sa i përket rraskapitjes emocionale, 3 për qind e punonjësve në BE raportojnë se ndihen gjithmonë emocionalisht të lodhur nga puna, 10 për qind shumicën e kohës, 28 për qind ndonjëherë, 30 për qind rrallë dhe 29 për qind asnjëherë.

Edhe në këtë rast, gratë kanë më shumë gjasa sesa burrat ta përjetojnë këtë gjithmonë ose shumicën e kohës, përkatësisht 15 për qind kundrejt 12 për qind.

Rraskapitja e vazhdueshme emocionale është më e përhapur te teknikët dhe operatorët e impianteve e makinerive, me nga 15 për qind. Sipas sektorëve, arsimi me 18 për qind dhe shëndetësia me 17 për qind kanë përqindjet më të larta të punonjësve të prekur.

Punonjësit e punësuar raportojnë rraskapitje emocionale më shpesh sesa të vetëpunësuarit, përkatësisht 14 për qind kundrejt 11 për qind.

Në krahasimin mes vendeve, përqindja më e lartë e punonjësve që ndihen gjithmonë ose shumicën e kohës emocionalisht të rraskapitur regjistrohet në Qipro, me 36 për qind, ndërsa më e ulëta në Holandë, me 6 për qind.

Në të gjithë BE-në, 8 për qind e punonjësve thonë se ndihen gjithmonë të rraskapitur fizikisht në fund të ditës së punës, 20 për qind shumicën e kohës, 39 për qind ndonjëherë, 22 për qind rrallë dhe 10 për qind asnjëherë.

Gratë kanë më shumë gjasa sesa burrat të raportojnë rraskapitje fizike gjithmonë ose shumicën e kohës, përkatësisht 30 për qind kundrejt 26 për qind.

Sipas profesioneve, pjesa e punonjësve që ndihen të rraskapitur fizikisht shumicën e kohës ose gjithmonë varion nga 20% te punonjësit administrativë deri në 37 për qind te punonjësit e kualifikuar në bujqësi.

Sipas sektorëve, përqindjet më të larta regjistrohen në shëndetësi dhe bujqësi, të dyja me 35 për qind.

Dallime të mëdha shfaqen edhe mes vendeve. Në Qipro, gati gjysma e punonjësve, 44 për qind, raportojnë se ndihen gjithmonë ose shumicën e kohës të rraskapitur fizikisht për shkak të punës, përqindja më e lartë ndër vendet e përfshira në anketë. Në të kundërt, niveli më i ulët i rraskapitjes fizike vërehet në Holandë, me 18 për qind.

Problemet shëndetësore më të zakonshme të raportuara nga punonjësit janë dhimbjet muskulare në shpatulla, qafë dhe gjymtyrët e sipërme, si edhe dhimbjet e shpinës, të dyja të raportuara nga 52 për qind e të anketuarve. Më pas renditen dhimbjet e kokës dhe lodhja e syve me 47 për qind, dhimbjet muskulare në ije dhe gjymtyrët e poshtme me 38 për qind, si dhe ankthi me 21 për qind.

Gratë raportojnë më shumë probleme shëndetësore sesa burrat në të gjitha kategoritë e përfshira në anketë. Diferencat më të mëdha gjinore shfaqen te dhimbjet e kokës dhe lodhja e syve, të raportuara nga 54 për qind e grave dhe 41 për qind e burrave, si dhe te ankthi, i raportuar nga 26 për qind e grave dhe 16 për qind e burrave.

Anketa

Anketa Europiane për Kushtet e Punës 2024, e publikuar në prill të këtij viti ofron një panoramë të plotë të cilësisë së punës në Europë, duke analizuar karakteristikat e fuqisë punëtore, vendet e punës, cilësinë e punës dhe cilësinë e jetës në punë.

Anketa është një instrument i rëndësishëm për politikëbërësit, pasi nxjerr në pah rolin e cilësisë së punës në arritjen e një rritjeje të qëndrueshme dhe gjithëpërfshirëse në Europë.

Gjetjet e anketës bazohen në 36.644 intervista ballë për ballë, të zhvilluara në 35 vende. Çdo intervistë zgjati rreth 45 minuta, duke ofruar një pasqyrë unike mbi gjendjen e punës në Europë.

Kjo anketë është zhvilluar në mënyrë të rregullt që nga viti 1990, duke ofruar një seri të krahasueshme të të dhënave për kushtet e punës në Europë në intervale pesëvjeçare./Monitor/