Miqësorja Shqipëri-Izrael, trajneri Maran bënë ndryshime në formacion! Policia publikon planin e masave
Shqipëria do të luajë sot një ndeshje miqësore ndaj Izraelit, e cila njëkohësisht do të jetë e para për kuqezinjtë nën drejtimin e trajnerit italian Rolando Maran ndërsa janë paralajmëruar dhe ndryshime në foprmacion.
Ndërkohë Policia e Shtetit ka publikuar planin e masave për garantimin e rendit dhe sigurisë, para, gjatë dhe pas zhvillimit të ndeshjes miqësore të futbollit ndërmjet ekipeve të Shqipërisë dhe Izraelit, që do të zhvillohet sot me fillim në orën 20:00, në stadiumin “Air Albania”.
Tekniku Rolando Maran nuk ka pasur kohë të mjaftueshme për të përgatitur këtë takim, duke qenë se skuadra ka zhvilluar vetëm 2 seanca stërvitore nën drejtimin e tij, megjithatë vetë trajneri u shpreh se ua ka dhënë idetë e tyre lojtarëve. Në debutim me Shqipërinë, pritet që Maran të bëjë ndryshime në formacion dhe menjëherë, do të provojë që të luajë me skemën e preferuar dhe pritet që të ketë një Shqipëri me 4-3-1-2, raporton “Panorama”.
Në portë, me shumë gjasa do të jetë Alen Sherri titullar, ndërkohë që në mbrojtje pritet të jetë Mitaj dhe Hysaj nga krahët, e në qendër të ketë hapësirë për dyshen Gjimshiti-Ajeti.
Në mesfushë, me shumë gjasa do të jenë Shehu, Asllani dhe Ramadani që do të jenë më shumë në ndihmë të mbrojtjes, ndërkohë që më i avancuar, pritet të jetë Nedim Bajrami, në rolin e organizatorit i cili është në balotazh me Anis Mehmetin.
Dyshja e sulmit, me shumë gjasa do të përbëhet nga Armando Broja dhe Myrto Uzuni, megjithëse edhe Daku është një alternativë për ta nisur titullar. Ditën e sotme, trajneri pritet të ndajë përfundimisht edhe formacionin duke qenë se ka dilema deri në momentin e fundit, jo vetëm për titullarët, por edhe për skemën të cilën do të përdorë.
Njoftim:
Policia e Shtetit/Plan masash për garantimin e rendit dhe sigurisë, para, gjatë dhe pas zhvillimit të ndeshjes miqësore të futbollit ndërmjet ekipeve të Shqipërisë dhe Izraelit, që do të zhvillohet më datë 03.06.2026, në orën 20:00, në stadiumin “Air Albania”.
Plani i masave parashikon detyrat që do të kryejnë të gjitha strukturat, duke u mbështetur në përvojën pozitive për planifikimin, organizimin dhe menaxhimin e situatës së rendit dhe sigurisë publike gjatë aktiviteteve ndërkombëtare.
Për mbarëvajtjen e këtij aktiviteti, si dhe për të lehtësuar qarkullimin e automjeteve në qytetin e Tiranës, gjatë datës 03.06.2026, nga Policia e Shtetit, në bashkëpunim me Policinë Bashkiake të Tiranës, do të aplikohen kufizime të qarkullimit të mjeteve në disa akse rrugore në afërsi të stadiumit.
Rrugët që do të jenë të bllokuara, duke filluar nga ora 16:00, datë 03.06.2026, deri në përfundim të ndeshjes:
•Bulevardi “Dëshmorët e Kombit”, nga fast food “Laguna”, pranë urës së ish-hotel Dajtit;
•Rruga “Papa Gjon Pali II”, te kryqëzimi i RTSH-së;
•Rruga “Dervish Hima”, pranë ambasadës së SHBA-së;
•Rruga “Asim Zeneli”, pranë ambasadës së SHBA-së;
•Rruga “Themistokli Gërmenji”, në fillim të rrugës;
•Rruga “Ismail Qemali”, te kryqëzimi i RTSH-së;
•Rruga “Lekë Dukagjini”, pranë ish-Gardës së Republikës, korridor hyrjeje për në parkimin e caktuar vetëm për mjetet e autorizuara nga FSHF-ja;
•Rruga “Abdyl Frashëri”, pranë kryqëzimit të Librit Universitar;
•Te sheshi “Willson”, devijohet lëvizja në drejtim të rrugës “Sami Frashëri”, pak para përfundimit të ndeshjes.
-Rruga e Elbasanit, Unaza dhe bulevardi “Bajram Curri” do të jenë të lira për lëvizjen e mjeteve.
Në zbatim të planit të masave, punonjësit e Policisë së Shtetit do të ushtrojnë kontroll të imtësishëm ndaj tifozëve, para futjes në stadium, me qëllim parandalimin e futjes në stadium, të banderolave me përmbajtje raciste, fishekzjarrëve, flakadanëve, lëndëve piroteknike, monedhave metalike, çadrave, çakmakëve, karikuesve të celularëve, mjeteve/produkteve për përdorim kozmetik dhe sendeve të tjera të forta, të rrezikshme për jetën dhe shëndetin e pjesëmarrësve.
Kërkojmë mirëkuptimin e tifozëve që të paraqiten në hyrjet e stadiumit, duke filluar nga ora 18:00, pasi, për shkak të fluksit të tifozëve pak para fillimit të ndeshjes, mund të humbasin mundësinë për të hyrë në stadium.
Për mbarëvajtjen e këtij aktiviteti sportiv, Policia e Shtetit ka angazhuar qindra punonjës policie, të cilët do të garantojnë rendin dhe sigurinë publike, si dhe do t’u ofrojnë ndihmë dhe informacion, në rast nevoje, në mënyrë që ky aktivitet të përmbyllet pa incidente, në interes të imazhit të vendit.
