Kosovë, sot nis numërimi i votave nga përfaqësitë diplomatike

Sot duke filluar nga ora 16:00, në Qendrën e Numërimit dhe Rezultateve, QNR, fillon procesi i numërimit të fletëvotimeve nga votimi në përfaqësitë diplomatike për zgjedhjet e parakohshme parlamentare të 7 Qershorit në Kosovë.

Zëdhënësi i KQZ-së, Valmir Elezi, rikujtoi se votimi fizik jashtë Kosovës është zhvilluar më 6 qershor në 30 përfaqësi diplomatike. Ai ka bërë të ditur se nga 27.724 votues të regjistruar kanë votuar rreth 81 për qind e tyre, apo 22.414 votues.

Ndërkohë, në QNR është duke vazhduar procesi i vlerësimit të pakove të supozuara me fletëvotime nga votimi me postë jashtë Kosovës. Sipas KQZ-së, nga 23 kuti postare janë tërhequr mbi 85.700 pako të supozuara me fletëvotime, të cilat po i nënshtrohen verifikimit.

Pas përfundimit të numërimit të çdo vendvotimi, të dhënat janë duke u publikuar në platformën e KQZ-së për rezultate: https://resultsparliamentary2026.kqz-ks.org/