AfD për herë të parë në epërsi bindëse në Gjermani
Partia populiste e krahut të djathtë, Alternativa për Gjermaninë, AfD, po fiton terren në të gjitha sondazhet e opinionit dhe tani është partia politike më popullore, raportuan sot mediat gjermane.
Sondazhi i rregullt i opinionit publik nga televizioni publik ZDF, “Barometri Politik”, tregon se AfD gëzon një avantazh prej katër pikësh përqindjeje ndaj Unionit Demokratik Kristian, CDU/CSU, në pushtet.
Kur u pyetën: “Për kë do të votonit nëse zgjedhjet parlamentare do të mbaheshin të dielën e ardhshme”, 28 për qind e të anketuarve zgjodhën AfD-në, ndërsa 24 për qind zgjodhën CDU/CSU-në, që është një rritje prej dy pikësh përqindjeje krahasuar me sondazhin e mëparshëm.
Vendi i tretë për SPD-në
Në vendin e tretë është partneri i vogël në qeverinë e Friedrich Merz, Partia Social Demokratike e Gjermanisë, SPD, me 13 përqind. Partitë e Gjelbra dhe të Majta vijojnë me përkatësisht 12 dhe 11 për qind.
Në sondazhet e opinionit nga institutet e tjera, AfD po arrin rezultate edhe më të mira. Në sondazhet e instituteve Insa dhe YouGov, AfD mbështetet nga 29 për qind e të anketuarve, ndërsa Unioni është në vendin e dytë me përkatësisht 22 dhe 20 për qind.
Kështu, partitë qeveritare po humbasin popullaritet pavarësisht faktit se kanë bërë hapa të rëndësishëm që kur kanë ardhur në pushtet në uljen e migracionit të parregullt, me kufizimet e imigracionit që janë një nga kartat kryesore të AfD-së opozitare.
Në të njëjtën kohë, anketa “Barometri Politik” tregoi ngurrimin e qytetarëve për të pranuar barrën që vjen me reformat e planifikuara të sistemit social të qeverisë aktuale Kristian Demokrate-Social Demokrate.
Vetëm 25 për qind e të anketuarve janë të gatshëm të mbajnë barrën financiare që do të vinte me reformat gjithëpërfshirëse të sistemeve të pensioneve, shëndetit dhe mirëqenies sociale të planifikuara nga qeveria e Friedrich Merz.
Në shtator, zgjedhjet për parlamentet e shteteve do mbahen në disa shtete federale në lindje të vendit, ku AfD pritet të fitojë, dhe në Saksoni-Anhalt, pritet një shumicë absolute dhe emërimi i kryeministrit të parë të shtetit nga radhët e AfD-së.
Kush është Alice Weidel dhe çfarë është AfD?
Alternativa për Gjermaninë, AfD, është një parti politike e themeluar në vitin 2013, e përshkruar vazhdimisht si e ekstremit të djathtë, nacionaliste dhe populiste nga Agjencitë kryesore ndërkombëtare të lajmeve si Reuters, AP dhe AFP.
Partia ka ndërtuar ndikimin e saj politik në një platformë kundërshtimi të fortë ndaj imigracionit masiv dhe euroskepticizmit.
Që nga fillimi i pushtimit rus të Ukrainës, AfD është profilizuar si kundërshtarja më e zëshme e dërgimit të armëve gjermane në Kiev dhe futjes së sanksioneve ekonomike kundër Moskës.
Për shkak të qëndrimeve të tilla, kundërshtarët politikë dhe analistët perëndimorë i shënojnë rregullisht ata si një opsion pro-rus që mbron drejtpërdrejt interesat e Kremlinit në hapësirën politike gjermane.
Alice Weidel, doktoreshë e shkencave ekonomike me profesion me shumë vite përvojë pune në sektorin financiar, është në krye të partisë si bashkëpresidente së bashku me Tino Chrupalla, dhe kryeson grupin parlamentar të AfD-së në parlamentin federal, Bundestag. Ai konsiderohet si një nga figurat më të artikuluara, por edhe më kontraverse në skenën politike gjermane.
