Akullnajat zvicerane po humbasin gjithnjë e më shpejt borën. “Më vjen të qaj!”

Bora mbi akullnajat zvicerane është zhdukur disa javë më herët se zakonisht këtë verë, e nxitur nga një valë e nxehtësisë evropiane, thonë shkencëtarët. Sipas shkencëtarëve, Akullnaja Rhone në jug të Zvicrës përjetoi të ashtuquajturën “Ditë e Humbjes së Akullnajave” më 29 qershor, moment kur bora e grumbulluar gjatë dimrit shkrihet dhe akullnajat fillojnë të humbasin akullin poshtë saj.

Drejtori i Shërbimit Zviceran të Monitorimit të Akullnajave, Matthias Huss, tha se kanë mbetur ende tre muaj këtë vit për tu shkri akulli që është grumbulluar gjatë dekadave apo edhe shekujve. “Kjo është një situatë vërtet shqetësuese”, tha ai. Dy valë të nxehta këtë vit, pas mungesës së reshjeve të dëborës në dimër, kanë ndihmuar në shtyrjen e “Ditës së Humbjes së Akullnajave” në datën e saj të dytë më të hershme që nga fillimi i regjistrimeve.

Në vitin 2022, ndodhi tre ditë më parë. Gjatë valës së nxehtësisë së qershorit, uji i shkrirë nga akullnajat në të gjithë Zvicrën mund të mbushte një pishinë me madhësi olimpike çdo gjashtë sekonda për dy javë, tha Huss.

“Më vjen të qaj”

“Akullnajat janë në një gjendje shumë të keqe në këtë kohë të vitit,” tha Matthias Huss. “Jemi në një situatë pothuajse aq kritike sa viti rekord 2022,” shtoi Huss duke theksuar se një stacion matës në Akullnajën Rhone regjistroi një humbje prej rreth 1.5 metrash akulli gjatë dy javëve të nxehtësisë ekstreme.

Turistët që vizitojnë akullnajat që po tërhiqen thonë se ndryshimet janë të pamundura për t’u injoruar. Turisti gjerman Harry Block, i cili ka vizituar Akullnajën Rhone për 50 vjet, u emocionua nga pamja. “Me vjen të qaj,” tha ai, duke përshkruar se si akullnaja, dikur 80 metra e lartë, është tkurrur ndërsa përfundon:

“Këtu shihni ndryshimin e klimës. Ky është ndryshimi i klimës”, përfundoi ai.