JAD Global Chain 2026, Policia e Kosovës mbyll 9 lokale të muzikës live dhe 10 qendra masazhi
Policia e Kosovës në koordinim me EUROPOL, INTERPOL, FRONTEX dhe institucione të tjera vendore e ndërkombëtare ka realizuar operacionin e udhëhequr nga Drejtoria për Hetimin e Trafikimit me Qenie Njerëzore në lokale me muzikë live, qendra masazhi, operacione për identifikimin e fëmijëve në situatë rruge si viktima të mundshme të trafikimit, si dhe planin taktik për luftimin e prostitucionit përmes eskortave ku janë mbyll 9 lokale muzike dhe 10 qendra masazhi.
“Gjatë inspektimit të 59 lokaleve me muzikë live në tërë Kosovën, janë hasur gjithsej 420 persona, prej tyre 317 femra dhe 109 meshkuj, prej tyre 186 shtetas të Kosovës ndërsa 234 shtetas të huaja, 220 prej të cilave shtetase të Shqipërisë, 9 femra shtetase të Serbisë, 4 femra shtetase te Maqedonia e Veriut dhe 1 femër shtetase e Bullgarisë,” thekson Policia e Kosovës përmes një njoftimi duke saktësuar se gjashtë lokale janë gjetur të mbyllura, ndërsa për shkelje administrative nga Inspektorët e MINT janë mbyllur nëntë lokale te muzikës live.
Gjithashtu, janë kontrolluar 62 qendra masazhi, ku janë hasur 104 persona, përfshirë 45 shtetas të huaj. Nga këto qendra, 10 janë mbyllur për shkelje administrative.
Policia bëri të ditur se gjatë zbatimit të planit nuk është identifikuar asnjë rast i veprës penale “Trafikim me njerëz”.
“Megjithatë, janë evidentuar shtatë raste të dyshuara për ‘Keqtrajtim apo braktisje të fëmijës’, ku janë arrestuar shtatë gra, katër shtetase të Shqipërisë, një e Malit të Zi dhe dy të Kosovës, të cilat u hasën duke kërkuar lëmoshë me fëmijët e tyre në rrugë dhe sheshe. Në total janë përfshirë 13 fëmijë, rastet e të cilëve janë trajtuar në bashkëpunim me Qendrat për Punë Sociale,” thekson Policia ndërsa janë evidentuar katër raste të kundërvajtjes “Marrje me prostitucion” në kuadër të eskortës, ku janë arrestuar tetë persona, katër shtetas të Kosovës dhe katër shtetase të huaja, dy nga Brazili dhe dy nga Kolumbia.
Të gjitha punëtoret e hasura duke punuar në lokalet e muzikës live, qendrat e masazhit dhe në aktivitetet e eskortës, thekson Policia e Kosovës, janë intervistuar për të verifikuar nëse ishin viktima të ndonjë forme të shfrytëzimit apo trafikimit, por nuk është identifikuar asnjë rast i tillë.
