Sekuestrohen rreth 3 kg marijuanë, vetura dhe telefona celularë

Policia e Kosovës, sot ka lokalizuar dhe vënë nën vëzhgim dy automjete të dyshuara me targa vendore që dyshohej se po transportonin substanca narkotike nga Prishtina në drejtim të Mitrovicës.

“Gjatë tentativës për ndalim, të dyshuarit nuk u janë bindur urdhrave zyrtar, me ç’rast kanë goditur zyrtarët policorë në uniformë, ku me qëllim të neutralizimit të rrezikut zyrtarët policorë kanë përdorur pajisjen zyrtare (armën e zjarrit),” njofton Policia.

Automjetet e dyshuara janë arritur që të ndalohen nga njësitë policore, ku gjatë kontrollit në njërën nga to është gjetur dhe sekuestruar rreth 3 kg substancë e dyshuar narkotike e llojit Marijuanë.

Në vazhdën e operacionit policor lidhur me rastin janë realizuar gjithsej tre bastisje në lokacione të ndryshme, ku në cilësi të provave për rastin po ashtu janë sekuestruar: 0.7 gram substancë e dyshuar narkotike po ashtu e llojit Marijuanë, dy automjete dhe dy telefona celularë.

“Për të gjitha veprimet operative lidhur me rastin është njoftuar prokurori kompetent me urdhër të të cilit personat e dyshuar pas arrestimit dhe nënshtrimit ndaj procedurave të tjera ligjore dërgohen në mbajtje për 48 orë,” njofton Policia e Kosovës.