Probleme teknike, BE shtyn sërish lëshimin e lejes së udhëtimit ETIAS

Leja e udhëtimit ETIAS, është shtyrë përsëri, duke i lënë udhëtarët pa viza që udhëtojnë drejt zonës Schengen, në pasiguri se kur do të duhet të aplikojnë, dhe, të paguajnë.

Bashkimin Evropian e arsyeton shtyrjen për një kohë të pacaktuar të Sistemit Evropian të Informacionit dhe Autorizimit të Udhëtimit, ETIAS, me problemet teknike me sistemin e ri kufitar të Evropës, raporton Euronews.

Për udhëtarët, nga vende si Mbretëria e Bashkuar, SHBA, Kanadaja dhe Australia që duhet të fillonin me aplikimin për autorizim para-udhëtimit duke filluar nga viti 2027, mesazhi është i thjeshtë për momentin: Mos aplikoni dhe mos paguani askënd që pretendon të ofrojë aplikime ETIAS.

Ndryshe, muajin e kaluar, The Financial Times, raportoi se ETIAS ka të ngjarë të shtyhet dhe tashmë në faqen e saj BE e bëri vendimin zyrtar:

“ETIAS aktualisht nuk është në funksion dhe nuk mblidhen aplikime për autorizime udhëtimi në këtë pikë! Bashkimi Evropian do të informojë për datën specifike për fillimin e ETIAS disa muaj para lançimit të tij.”

Ky vendim vjen pas kaosit që u krijua me sistemin e ri elektronik të hyrjes/daljes, EES, të Evropës, i cili shkaktoi radhë të gjata me pasagjerë në aeroporte si dhe fluturime të humbura gjatë sezonit veror.

Kur ETIAS të lançohet përfundimisht, do të kushtojë 20 euro dhe do të japë akses në 30 vende evropiane në Zonën Schengen, si dhe Islandë, Norvegji, Lihtenshtajn dhe Zvicër.

Fëmijët nën 18 vjeç, të rriturit mbi 70 vjeç dhe disa anëtarë të familjes së qytetarëve të BE-së thuhet se do të përjashtohen nga tarifat.

ETIAS do të jetë i vlefshëm për tre vjet ose derisa të skadojë pasaporta juaj dhe do t’u lejojë mbajtësve të qëndrojnë në Zonën Schengen deri në 90 ditë brenda çdo periudhe 180 ditore.