Shpërthim i fuqishëm në Portin e Roterdamit, një i vdekur dhe disa të plagosur

Një person ka vdekur dhe disa të tjerë janë plagosur në një shpërthim të fuqishëm që tronditi zonën e Portit të Rotterdamit sot, ka konfirmuar policia lokale.

Aksidenti ndodhi pak pas mesditës së sotme në ambientet e kompanisë në Moezelweg në Europoort, raporton Dutch News. Policia tha se nuk mund të japë detaje të mëtejshme rreth incidentit në këtë fazë të hetimit.

Shumë ekipe shpëtimi u dërguan me urgjencë në vendin e aksidentit: gjashtë ambulanca, një helikopter dhe zjarrfikëse. Disa persona të plagosur u dërguan në spital.

Fillimisht u ndërprere energjia elektrike

Sipas informacioneve fillestare, aksidenti dyshohet se ndodhi gjatë punimeve të mirëmbajtjes, ndërsa ekipi po shkëputte tubacionet. Dëmtimi i dukshëm në një nga rezervuarët e magazinimit tregon se ishte një shpërthim i fuqishëm.

Shpërthimi i sotëm ndodhi pak pasi një incident tjetër u raportua në zonën e portit më herët gjatë ditës. Një ndërprerje e energjisë elektrike në rafinerinë Esso në Botlekweg shkaktoi ndërprerjen e funksionimit të sistemeve.

Kjo shkaktoi zbrazjen e një tubacioni gazi dhe shfaqjen e flakëve të mëdha dhe tymit të zi mbi port. Autoriteti Rajonal i Sigurisë Rotterdam-Rijnmond tha se po hetonte ende nëse dy incidentet ishin të lidhura.