Lamallari mashtron qytetarët, Berisha: Vendi është totalisht në duart e krimit!

Vendi është totalisht në duart e krimit, tha sot Kryetari i Partisë Demokratike, Sali Berisha, ndërsa akuzoi Ministrin e Punëve të Brendshme, Besfort Lamallarin se po mashtron qytetarët.

Lidhur me situatën me zjarret, Kryetari i Partisë Demokratike vlerësoi se zjarret janë jashtë kontrollit në tërësi, zjarrfikësit po trajtohen në mënyrë të pashpirt nga qeveria.

“Këto ditë u provuan shqiptarëve se vendi është totalisht në duart e krimit. Në Sarandë, ai që duhet të luftojë krimin, shkon në diskotekë dhe në akte të palejueshme shqetëson qytetarët në lokal, detyron badigardët ta nxjerrin si një rrugaç jashtë lokalit dhe pastaj vërsulet policia kundër tyre.

Në Elbasan, siç e patë ju, ditën për drekë, para kamerave, para gjithë qytetarëve, vrasësi i vendos pas kokën tytën e revoles viktimës, pa asnjë lloj hezitimi apo shqetësimi.
Pas arrestimit, fillon përbaltja edhe e kriminelit, edhe e viktimës, në përputhje me doktrinën ‘kokën t’i hanë njëri-tjetrit’.
Një i shumëkërkuar, Ylli Zalla, i vendosin tritol në banesë dhe bën konferencë shtypi para shtëpisë së rrënuar nga tritoli. Akuzon policinë si autore e mundshme e tritolit.
Lamallari mashtron qytetarët, thotë se e arrestuan, ndërkohë Zalla u dorëzua vetë. Se si mund të ketë dorëzim tjetër se sa të dalë në konferencë shtypi, vetëm mendja bosh e Lamallarit mund ta cilësojë arrestim. Ai u dorëzua,” tha Sali Berisha ndërsa sa ai përket zjarreve tha se janë jashtë kontrollit.

“Ndërkohë, zjarret në të katër anët, në tërësi janë jashtë kontrollit. Trajtimi i zjarrfikësve dhe punonjësve të angazhuar në shuarjen e flakëve të zjarrit, është cinik, i pashpirt. Asnjë qindarkë nga premtimet, dhe që i meritojnë, të shtesave për vështirësitë e mëdha përballë zjarrit, atyre gjer sot nuk u është dhënë.
Asnjë prapavijë mbështetëse për punën tmerrësisht të vështirë dhe të rrezikshme që bëjnë, nuk kanë.
Ndërkohë, Rama dhe ministrat e tij bronzohen në diell, në plazhet më turistike të vendit. Pra, një shtet mafioz pa ligje, që funksionon i tëri në duart e krimit,” tha Kryetari i Partisë Demokratike duke paralajmëruar zëvendësimin e Niko Peleshit me Taulant Ballën, si viktimën e parë të Komisionit që kontrollon rrjetet sociale të nomenklaturës socialiste.

“Panik, tmerr, frikë në kampin e qeverisë. Krijohet Komisioni Balla.
Komisioni Balla është komisioni që po kontrollon statuset në mediat sociale të nomenklaturës, për të identifikuar ata, të cilët nuk kanë bërë statuse kundër lëvizjes rinore qytetare dhe flamingove pra.,” tha Kryetari i Partisë Demokratike, Sali Berisha, duke përfunduar:
“Viktima e parë e Komisionit Balla do jetë Niko Peleshi, i cili sipas Ballës, është treguar sylesh ndaj lëvizjes rinore qytetare dhe nuk ka statuse në mediat e tij kundër tyre. Pritet zëvendësimi i shpejtë i Peleshit me Ballën, laj e thaj, Balla i ka mbetur atij.
Me Kryetarin e Komisionit të Vëzhgimit të Rrjeteve Sociale të nomenklaturës socialiste.
A do ketë viktima të tjera? Do ketë, por ato janë pa emër, pa pasojë, ndaj dhe nuk ia vlen fare t’i përmendësh.”