Berat, autobusi me 52 turistë merr flakë në Qafën e Kalasë, digjet edhe një makinë

Një autobus me 52 turistë të huaj ka marrë flakë në ecje në zonën e Qafës së Kalasë, në Berat.

Zjarri nisi në pjesën e motorit, pasi u vunë re shkëndija gjatë lëvizjes së autobusit drejt Kalasë së Beratit. Drejtuesi ndaloi menjëherë mjetin dhe pasagjerët arritën të zbrisnin në kohë, përpara se flakët të përfshinin të gjithë autobusin.

Forca të shumta zjarrfikëse dhe policie mbërritën në vendngjarje për të vënë nën kontroll flakët. Pavarësisht ndërhyrjes, autobusi me targa AB 917 UE u shkrumbua plotësisht nga zjarri.

Flakët përfshinë edhe një automjet tip Benz fuoristradë, i cili ishte i parkuar pranë një banese, pasi pronari nuk arriti ta largonte mjetin në kohë.

Dyshohet se shkak i incidentit mund të ketë qenë një shkëndijë elektrike në motor, ndërsa hetimet vijojnë për të përcaktuar shkaqet e shpërthimit të zjarrit.

Ndërkohë drejtuesi i autobusit, Ervis Dyrmani nga Durrësi, është shoqëruar në polici për t’u marrë në pyetje lidhur me ngjarjen..