Një El Niño i madh po zhvillohet, meteorologët: Thatësira ekstreme, vapë dhe përmbytje po vijnë
Bota duhet të përgatitet për nxehtësi ekstreme, thatësirë dhe përmbytje në disa rajone në muajt e ardhshëm, ndërsa zhvillohet një El Niño jashtëzakonisht i fortë, paralajmëroi sot Organizata Botërore Meteorologjike, WMO, raporton Agjencia gjermane e llajmeve DPA.
Temperaturat e oqeaneve në Oqeanin Paqësor tropikal, të cilat ndikojnë fuqishëm në modelet e motit në të gjithë botën, janë tashmë jashtëzakonisht të larta, njoftoi agjencia e OKB-së me seli në Gjenevë.
“Po rritet para syve tanë në përmasa të papara”
“El Niño po rritet para syve tanë në përmasa të papara”, tha Sekretari i Përgjithshëm i OKB-së, António Guterres, në një deklaratë. “Shkenca nuk lë vend për dyshim: planeti ka hyrë në ujëra të paeksploruara dhe këto ujëra po ngrohen me shpejtësi”.
Edhe pse disa ekspertë të klimës tashmë po përdorin termin “Super El Niño”, vetë Organizata Botërore Meteorologjike e shmang këtë term. Agjencia i bazon parashikimet e saj për El Niño në llogaritjet nga një numër shërbimesh meteorologjike në të gjithë botën. Është një fenomen natyror që ndodh në intervale prej dy deri në shtatë vjetësh dhe nuk shkaktohet nga ndryshimet klimatike, por ndryshimet klimatike mund të rrisin ndjeshëm pasojat e tij.
“Kemi hyrë në një garë midis rreziqeve në rritje dhe gatishmërisë sonë për të ndërmarrë veprime dhe për të mbrojtur njerëzit. Duhet ta fitojmë këtë garë”, theksoi Guterres.
El Niño fillon me një ngrohje të sipërfaqes së detit në Paqësorin ekuatorial qendror dhe lindor. Sipas WMO-së, temperaturat atje janë tashmë 2.2 °C deri në 2.6 °C mbi mesataren afatgjatë. Është edhe më dramatike nën sipërfaqe, ku temperaturat e ujit ishin më shumë se 8 °C mbi mesataren në disa vende në korrik dhe në fillim të gushtit.
Çfarë do të thotë kjo për motin në të gjithë botën?
Kur oqeani ngrohet, ajri i ngrohtë dhe i lagësht fillon të rritet, duke ndryshuar drejtimet globale të erës dhe duke prishur qarkullimin atmosferik. Kjo zakonisht sjell thatësira të mëdha në Australi, Indonezi dhe Afrikën jugore, ndërsa bregu perëndimor i Amerikës së Jugut, Afrika lindore dhe Shtetet e Bashkuara jugore vuajnë rregullisht nga reshje të dendura shiu dhe përmbytje të menjëhershme. Evropa zakonisht preket më pak.
Temperaturat mesatare globale përgjithësisht arrijnë kulmin një vit pas fillimit të fenomenit. Ishte viti 2024, i regjistruar si viti më i ngrohtë i regjistruar me temperatura rreth 1.6 °C më të larta se periudha para-industriale, që pasoi një El Niño të fortë.
