Shtimi i turistëve, ndikim të dobët në numrin e përdoruesve celularë
Rritja statistikore e numrit të turistëve të huaj duket se po reflektohet në përmasa të kufizuara në shtimin e përdoruesve të shërbimeve celulare në vend.
Sipas të dhënave nga Autoriteti i Komunikimeve Elektronike dhe Postare, AKEP, në fund të tremujorit të dytë të vitit numri i përdoruesve aktivë i matur si numër i kartave SIM aktive të këtyre shërbimeve arriti në 2.49 milionë, në rritje me 2 për qind krahasuar me tremujorin e mëparshëm dhe në një rritje modeste me 0.2 për qind krahasuar me të njëjtën periudhë të një viti më parë.
Rritja vjetore është e barabartë me një numër prej më pak se 5 mijë përdoruesish.
Tendencë madje edhe më të dobët vjetore shfaqi numri i përdoruesve të internetit me brez të gjerë nga rrjetet celulare. Numri i tyre arriti në 2.1 milionë, me një rritje prej 2.4 për qind nga tremujori i mëparshëm, por në rënie me 0.1 për qind krahasuar me të njëjtën periudhë të një viti më parë.
Stanjacioni vjetor i numrit të përdoruesve celularë, mes të tjerash, dëshmon mungesën e një impakti të fortë, nga viti në vit, të turizmit hyrës. Të dhënat e INSTAT treguan se për 6-mujorin 2026, në Shqipëri u regjistruan 5.06 milionë hyrje të shtetasve të huaj, në rritje me 6.2 për qind krahasuar me një vit më parë.
Por, rritja vjetore e numrit të përdoruesve celularë ka qenë e papërfillshme, si për tremujorin e parë, ashtu edhe për të dytin. Në përgjithësi, turistët që vizitojnë një vend për periudha shumëditore përdorin karta SIM të operatorëve vendas, për të shmangur koston e tarifave roaming. Kjo praktikë është lehtësuar edhe nga zhvillimet teknologjike, ku zhvendosja drejt SIM e ka lehtësuar blerjen dhe përdorimin e një numri të ri celular.
Megjithatë, në rastin e vizitorëve të huaj në Shqipëri, një lidhje e tillë duket të jetë e dobët, nëse marrim për të mirëqena statistikat paralele të Instat dhe AKEP.
Në rastin e vizitorëve nga vendet fqinje të Ballkanit Perëndimor, kjo mund të shpjegohet me marrëveshjen rajonale roam like at home, që e ka bërë përgjithësisht të panevojshëm përdorimin e numrave celularë shqiptarë prej tyre.
Në afatin e gjatë, tregu i shërbimeve celulare po shfaq tendencë të rënies së numrit të përdoruesve. Në dekadën e fundit, numri i përdoruesve aktivë të telefonisë celulare ka rënë me rreth 28 për qind.
Pjesërisht, kjo mund të shpjegohet me faktorët demografikë dhe uljen e numrit të përgjithshëm të popullsisë. Por, nga ana tjetër, ulja e numrit të përdoruesve aktivë pjesërisht është ndikuar edhe nga zhvillimet e brendshme të tregut.
Numri i operatorëve celularë është ulur në dy, nga katër që kishte qenë deri në vitin 2017. Sot është gjithnjë e më pak e përhapur që një përdorues të mbajë më shumë se një numër celular.
Kjo tendencë kishte qenë mjaft tipike afërsisht deri në vitin 2014, kur AKEP ndaloi diferencimin e çmimeve për thirrjet brenda rrjetit dhe ato jashtë rrjetit./Monitor/
