Pas katër vitesh, Suedia ndryshon qeverinë. Kryeministri jep dorëheqjen.

Opozita suedeze e qendrës së majtë fitoi 176 vende në zgjedhjet parlamentare të së dielës, ndërsa blloku i krahut të djathtë në pushtet fitoi 173, tregojnë rezultatet pas numërimit të votave.

Konfirmimi zyrtar i rezultatit përfundimtar pritet në ditët në vijim.

Ky rezultati hap rrugën për një ndryshim qeverie dhe rikthimin e mundshëm të udhëheqëses së Partisë Social Demokrate, Magdalena Andersson, në postin e kryeministrit pas katër vitesh në opozitë.

Kristersson jep dorëheqjen

Kryeministri suedez Ulf Kristersson i Partisë së Moderuar të krahut të djathtë njoftoi dorëheqjen e tij pas humbjes në zgjedhje. “Kryetari i parlamentit tani do të udhëheqë fazën tjetër të rrugës drejt një qeverie të re. Me anë të kësaj kërkoj që të lirohem nga detyrat e mia si kryeministër në mënyrë që kjo punë të fillojë menjëherë,” tha Kristersson në një letër të postuar në rrjetin social X.

Mitt brev till talmannen pic.twitter.com/NtSSTVRD5r

— Ulf Kristersson (@SwedishPM) September 17, 2026

Për qendrën e majtë, një fitore zgjedhore mund të jetë vetëm hapi i parë në një proces të gjatë të formimit të një qeverie. Andersson do të duhet të përpiqet të sigurojë shumicën në parlamentin me 349 vende, ndërsa ka dallime midis partive të bllokut opozitar mbi bashkëpunimin e ardhshëm.