Kurti në SHBA: Aktgjykimi i Gjykatës Speciale përmban pasaktësi faktike e gabime ligjore
Aktgjykimi i Gjykatës Speciale ndaj katër ish-krerëve të Ushtrisë Çlirimtare të Kosovës, dhe çështja e shqiptarëve në Luginën e Preshevës ishin temë e diskutimit të takimit që Kryeministri i Kosovës, Albin Kurti, zhvilloi gjatë vizitës së tij në Shtetet e Bashkuara me kongresmenin amerikan Mike Lawler.
Aktgjykimi i Dhomave të Specializuara të Kosovës në Hagë, u shpreh Albin Kurti pas takimit përmes rrjetit social X, përmban pasaktësi faktike, keqkuptime historike dhe gabime ligjore dhe pritet që këto çështje të korrigjohen në procedurën e apelit.
“Aktgjykimi shpërfilli pretendimet fyese dhe të pabesueshme të raportit të Dick Martyt për trafikimin e organeve, të cilat ishin aq të pabaza saqë as nuk u përfshinë në aktakuzën e Prokurorisë; gjithashtu, ai hodhi poshtë kategorikisht pretendimet e Prokurorisë për krime kundër njerëzimit. Megjithatë, gjetjet e mbetura u bazuan në pasaktësi faktike, keqkuptime historike dhe gabime juridike,” tha Albin Kurti duke bërë të ditur se në takimin me Lawler është diskutuar edhe për gjendjen e shqiptarëve në Luginën e Preshevës.
“I kërkova mbështetjen e tij për trajtimin e çështjes së pasivizimit të adresave të shqiptarëve në Serbi, i cili ndikon në të drejtat e tyre të votimit dhe në qasjen në dokumentet zyrtare,” tha Kryeministri i Kosovës duke fol për takimin ku mori pjesë edhe deputeti shqiptar në Parlamentin e Serbisë, Shaip Kamberi.
Ndryshe, takimi me kongresmenin amerikan Mike Lawler vjen në kuadër të vizitës së Kryeministrit të Kosovës në SHBA, ku ai po zhvillon takime në kuadër të Javës së Nivelit të Lartë të Asamblesë së Përgjithshme të Kombeve të Bashkuara.
Vizita e Albin Kurtit në SHBA pason deklarimet e tij për nevojën e një strategjie shtetërore lidhur me reagimin ndaj aktgjykimit të Gjykatës Speciale. Më herët ai ka theksuar se Qeveria do të mbështesë ekipet mbrojtëse në procedurat e Apelit dhe do të angazhohet edhe në rrafshin diplomatik.
Më 16 shtator, Dhomat e Specializuara i shpallën fajtorë dhe dënuan me gjithsej 81 vjet burgim ish-krerët e UÇK-së. Hashim Thaçi dhe Jakup Krasniqi u dënuan me nga 25 vjet burgim, Kadri Veseli me 18 vjet, ndërsa Rexhep Selimi me 13 vjet burgim. Ata u dënuan për krime lufte.
