Kosova, investitori i tretë më i madh në Shqipëri me 186.4 milionë euro
Bizneset nga Kosova po e zgjerojnë praninë në tregun shqiptar përmes blerjeve dhe investimeve në kompani të mëdha. Vetëm gjatë vitit 2025, investimet nga Kosova në Shqipëri arritën në 186.4 milionë euro.
Drejtori ekzekutiv i Klubit të Prodhuesve të Kosovës, Astrit Panxha, tha se Kosova është bërë investitori i tretë më i madh në Shqipëri, pas Holandës dhe Italisë.
Përmes një postimi në Facebook, Panxha ka theksuar se vitet e fundit bizneset nga Kosova nuk po investojnë në Shqipëri vetëm në sektorin e patundshmërive, por edhe përmes blerjes dhe zhvillimit të kompanive të mëdha.
Sipas tij, ky zhvillim tregon se marrëdhëniet ekonomike mes Kosovës dhe Shqipërisë janë avancuar më shpejt se ato politike.
Ndër investimet kryesore të kompanive nga Kosova në Shqipëri, Panxha ka përmendur blerjen e SPAR Albania nga Viva Fresh Group për 36.4 milionë euro. Transaksioni është finalizuar në vitin 2025, ndërsa Viva Fresh ka marrë mbështetje financiare prej deri në 25 milionë eurosh nga BERZH dhe ENEF II për blerjen.
Viva Fresh më pas ka zgjeruar praninë e saj në tregun shqiptar edhe përmes blerjes së rrjetit “Eco Market”, transaksion i njoftuar nga Autoriteti i Konkurrencës në Shqipëri në shtator të këtij viti.
Panxha ka përmendur edhe Albi Group, i cili ka blerë Fashion Group Albania për rreth 7.6 milionë euro. Blerja përfshin operacionet e markave ndërkombëtare si Mango, Geox, Parfois, Carpisa dhe Aldo.
Në listën e investimeve të përmendura nga Panxha është edhe KAN Group, i cili ka marrë operimin e KFC-së në Shqipëri dhe po e zgjeron aktivitetin në rajon.
Po ashtu, ai ka veçuar investimin e Dukagjini Group në Dukagjini Resort në Rana e Hedhun, me vlerë të raportuar prej rreth 80 milionë eurosh.
Një tjetër zhvillim i rëndësishëm është blerja e Tring nga Vertex Holding, kompani e lidhur me Artmotion dhe Devolli Corporation, duke zgjeruar kështu praninë e kapitalit nga Kosova në sektorin shqiptar të mediave dhe telekomunikacionit.
“Këto kompani nuk po ikin prej Kosovës. Në Kosovë janë rritë dhe forcu; tash po bahen kompani rajonale”, ka shkruar Panxha.
Sipas tij, Shqipëria po shndërrohet në tregun e parë të natyrshëm për zgjerimin rajonal të kompanive kosovare.
“Vetëm gjatë vitit 2025, bizneset nga Kosova investuan 186.4 milionë euro në Shqipëri. Me këtë shumë, Kosova u rendit investitori i tretë ma i madh, pas Holandës dhe Italisë. E Shqipëria është hapi i parë ma i natyrshëm”, ka deklaruar ai, duke e përmbyllur postimin me konstatimin se Kosova është një vend i vogël, por me kompani që po krijojnë kapital dhe po zgjerojnë aktivitetin përtej tregut vendor.
Disa prej investimeve kryesore:
– Viva Fresh Group e bleu SPAR Albania për 36.4 milionë euro, pastaj rrjetin Eco Market dhe gjashtë markete të KMY-së.
– Albi Group e bleu Fashion Group Albania për rreth 7.6 milionë euro, bashkë me operacionet e Mango, Geox, Parfois, Carpisa dhe Aldo.
– KAN Group e mori operimin e KFC-së në Shqipëri dhe po zgjerohet në krejt rajonin.
– Dukagjini Group po investon rreth 80 milionë euro në Dukagjini Resort, te Rana e Hedhun.
– Vertex Holding, kompani e lidhun me Artmotion dhe Devolli Corporation, e bleu Tring-un, një prej operatorëve kryesorë të televizionit dhe internetit./Monitor/
