Vuçiç: Fola me Putinin për një orë. Nesër do të jap dorëheqjen!
Presidenti i Serbisë, Aleksandar Vuçiç, bëri të ditur se ka fol në telefon për një orë me Presidentin rus Vladimir Putin ku tema kryesore ishte bashkëpunimi në energji, ndërsa shprehu bindjen se marrëveshja e gazit do të zgjatet me një çmim të pandryshuar.
Gjatë kësaj bisede u fol gjithashtu për industrinë serbe të naftës, marrëdhëniet dypalëshe dhe konfliktin në Ukrainë. Përmes rrjetit social Instagram Vuçiç konfirmoi se e kishte informuar Putinin për dorëheqjen e tij nesër, të cilën e kishte njoftuar ditët e fundit.
Furnizimi me gaz i vazhdueshëm me një çmim të favorshëm
Me këtë rast Presidenti i Serbisë tha se ishte i bindur në zgjatjen e marrëveshjes së gazit, e cila skadon më 30 shtator.
“Ne kemi qenë veçanërisht të shqetësuar për bashkëpunimin në energji, përkatësisht marrëveshjen e gazit, e cila skadon më 30 shtator. Besoj se pas bisedimeve të sotme ajo do të zgjatet dhe se ne do të sigurojmë një furnizim të qëndrueshëm me gaz,” tha Vuçiç duke konfirmuar se Serbia do të vazhdojë të paguajë 318 euro për 1.000 metra kub gaz, ndërsa çmimi aktual i tregut është 868 euro.
Vuçiç diskutoi gjithashtu së fundmi marrëveshjen e re me Ministrin e Jashtëm rus Sergei Lavrov në New York. Në atë kohë, ai tha se priste që marrëveshja e re të përfundohej deri në fund të shtatorit.
“Brenda pak ditësh, skadon aneksi i kontratës për marrëveshjen e gazit dhe jam i sigurt se do të zgjatet që të hënën. Pra, ne do të vazhdojmë të kemi, do të thoja, një çmim të mirë dhe të ulët për gazin. Që njerëzit ta kuptojnë, është rreth 318 euro për 1000 metra kub, ndërsa çmimi i tregut është aktualisht 868 euro”, tha ai duke zbardhur dhe detaje të tjera të bisedës:
“Ne gjithashtu prekëm çështje të tjera të rëndësishme, siç është pjesëmarrja e Hekurudhave Ruse në projekte. E falënderova për mbështetjen në shuarjen e zjarrit, ku avioni Ilyushin dhe ekuipazhi rus bënë një punë të shkëlqyer.”
Vuçiç konfirmon se nesër do të japë dorëheqjen
Presidenti serb konfirmoi se e kishte informuar drejtpërdrejt Putinin për dorëheqjen e tij.
“Së fundmi, në emër të Republikës së Serbisë dhe në emrin tim personal, falënderova Federatën Ruse dhe Presidentin Putin për bashkëpunimin e tyre gjatë 14 viteve të fundit dhe e informova se nesër po jap dorëheqjen,” tha Presidenti i Serbisë, Aleksandar Vuçiç përmes një videomesazhi në rrjetin social Instagram duke përfunduar:
“Shpresoj që presidentët e ardhshëm të Serbisë do të dinë gjithashtu si ta zhvillojnë me përgjegjësi politikën e jashtme të vendit tonë dhe të ruajnë ekuilibrin ndaj të gjithë aktorëve në skenën ndërkombëtare.”
