Mikro-udhëtimet dhe tendenca të tjera që pritet të marrin hov në 2027

Sipas raportit të ri të Hilton për tendencat, udhëtarët po kërkojnë gjithnjë e më shumë të kalojnë kohë në natyrë.

Vitin e ardhshëm, udhëtarët do të bëjnë udhëtime më të shpeshta, por më të shkurtra, do të rezervojnë “udhëtime për zhvillim personal” dhe do t’i japin përparësi qëndrimit në natyrë për mirëqenien e tyre.

Edhe pse sapo kemi hyrë në tetor, industria e udhëtimeve ka nisur tashmë të kthejë vëmendjen nga viti 2027 dhe më tej.

Kompania më e fundit që ka tentuar të parashikojë të ardhmen është Hilton, me publikimin e Raportit të Tendencave 2027.

Bazuar në një anketë me rreth 15 mijë udhëtarë nga Mbretëria e Bashkuar, Gjermania, Turqia, SHBA-ja, Australia dhe vende të tjera, grupi hotelier ka identifikuar pesë tendenca kryesore që pritet të marrin hov.

“Po shohim se udhëtarët janë më pak të interesuar për përkufizimin e dikujt tjetër mbi përsosmërinë dhe më shumë të përqendruar në planifikimin e udhëtimeve sipas kushteve të tyre”, tha Chris Nassetta, president dhe drejtor ekzekutiv i Hilton.

“Raporti i këtij viti përforcon idenë se njerëzit po kërkojnë përvoja që përshtaten me jetën e tyre, që i ndihmojnë të rigjenerohen dhe që krijojnë kuptim, i cili zgjat edhe shumë kohë pasi janë kthyer në shtëpi.”

Cilat janë tendencat kryesore për vitin 2027?

Një nga tendencat kryesore të identifikuara nga Hilton është “mendësia e mikro-udhëtimit”, ku njerëzit po u japin përparësi arratisjeve më të shkurtra dhe më të shpeshta, “që janë më të lehta për t’u planifikuar, më të lehta për t’u realizuar dhe më të lehta për t’u përshtatur me jetën e përditshme”.

Një në katër persona zgjedh këtë mënyrë udhëtimi sepse udhëtimet më të shkurtra i lejojnë t’i përshtatin ato me orarin e punës, ndërsa 29 për qind zgjedhin të udhëtojnë në këtë mënyrë për të qenë më spontanë.

Ekzistojnë dy lloje mikro-udhëtarësh: “përzgjedhësit” dhe “grumbulluesit”.

Të parët e ndërtojnë udhëtimin rreth një përvoje të vetme, si një koncert, një aktivitet sportiv ose një rezervim në restorant, ndërsa të dytët duan të përfshijnë sa më shumë përvoja të jetë e mundur. Rreth 57 për qind e të anketuarve thanë se u pëlqen të vizitojnë disa qytete brenda të njëjtit udhëtim.

Një tjetër tendencë që shumë udhëtarë duket se janë gati ta përqafojnë është pranimi i faktit se pushimet nuk do të jenë të përsosura dhe as nuk është e nevojshme të jenë të tilla.

Turistët po bëhen “pothuajse të shëndetshëm”, duke zgjedhur se cilat zakone të shëndetshme do të vazhdojnë t’i ndjekin gjatë pushimeve; “pothuajse aventurierë”, me 28 për qind të njerëzve që preferojnë t’i vendosin gjërat gjatë rrugës, krahasuar me 18 për qind që duan një itinerar të përcaktuar; dhe “pothuajse vetëm”, ku tre në dhjetë persona udhëtojnë vetëm, por takohen me dikë që njohin pasi mbërrijnë në destinacion, ndërsa 20 për qind u bashkohen ekskursioneve në grup ose udhëtimeve ditore me njerëz që nuk i njohin.

Njerëzit po rezervojnë gjithashtu “udhëtime për zhvillim personal”, ndërsa po shtohen edhe të ashtuquajturat “skillcations”, ose pushime ku udhëtari mëson një aftësi të re, duke zgjeruar njohuritë përmes kurseve të gjuhëve, gatimit ose artit.

Udhëtarët po kërkojnë gjithashtu të ndryshojnë këndvështrimin e tyre, me 34 për qind që thonë se duan që përvojat e udhëtimit t’u japin një mënyrë të re të menduari.

Udhëtimet për mirëqenie janë bërë shumë më të njohura gjatë viteve të fundit dhe viti 2027 nuk pritet të jetë ndryshe. Ajo që po ndryshon, megjithatë, është rëndësia që po merr natyra brenda këtyre përvojave.

Si pjesë e tendencës së quajtur “mirëqenia e rikonceptuar”, 79 për qind e të anketuarve thanë se ajri i pastër dhe qëndrimi në natyrë janë thelbësore për relaksimin, ndërsa më shumë se gjysma kalojnë më shumë kohë të zhytur në natyrë gjatë pushimeve sesa kur janë në shtëpi.

Së fundi, “ekuacioni i besimit në udhëtime” tregon se, ndonëse IA po bëhet gjithnjë e më e dobishme për planifikimin e udhëtimeve, turistët vazhdojnë të kenë më shumë besim te rekomandimet personale dhe njerëzore.

Nga të anketuarit, 70 për qind thanë se u besojnë këshillave të stafit të hoteleve, ndërsa 87 për qind janë drejtuar te familjarët për rekomandime.

Përveç familjarëve, rreth 50 për qind e njerëzve thanë se kanë më shumë gjasa t’u besojnë rekomandimeve që vijnë nga persona me status besnikërie në një program klientësh./Euronews/ Monitor/