Risitë e zgjedhjeve të mesmandatit, senatori i parë musliman, dhe, guvernatori me ngjyrë i Floridas
Në kohën kur nga Shtetet e Bashkuara konfirmohet se në zgjedhjet e mesmandatit Demokratët arritën të fitojnë shumicën ku tashmë kanë 225 mandate në Dhomën e Përfaqësuesve përballë 136 republikanëve, ndërsa në Senat 54 përballë 42 republikanëve, këtu nuk përfundojnë risitë e kësaj dite që tronditën Administratën Trump dhe gjithë mbështetësit e saj.
Duke filluar prej sot, Amerika do të ketë dhe senatorin e parë musliman, demokratin Abdul El-Sayed, si dhe guvernatorin e parë me ngjyrë në histori të Floridas, republikanin Byron Donalds.
Kandidati demokrat për Senatin Amerikan, Abdul El-Sayed, pasi shpalli fitoren në zgjedhjet e Michiganit falënderoi mbështetit dhe kundërshtarët e tij.
“Michigan, ia dolëm!” u tha El-Sayed mbështetësve të tij duke u shprehur jashtëzakonisht krenar dhe i nderuar që u bë senatori i tyre i ri.
“Ju i dhatë një shans kandidatit nga i cili pritej më pak ta bënte këtë, dhe për këtë ju falënderoj. Kjo është e gjitha meritë juaja,” tha myslimani i parë i zgjedhur në Senatin Amerikan duke falënderuar votuesit që e mirëpritën në kishat, sinagogat dhe shtëpitë e tyre gjatë fushatës.
“Faleminderit për besimin, besimin dhe mirësinë tuaj. Do t’i marr të gjitha këto me vete dhe shpresoj t’jua shpërblej me një lidership që do ta justifikojë më shumë seç duhet besimin tuaj”, tha ai. El-Sayed pretendoi se kundërshtarët e tij politikë gjatë fushatës sulmuan jo vetëm atë, por edhe votuesit e tij.
“Ata duan një Amerikë ku nuk ka vend për disa prej nesh. Ne e dimë se Amerika është mjaftueshëm e madhe për të gjithë ne”, tha ai.
Gara zgjedhore në Michigan u shënua nga përplasje të ashpra dhe sulme personale. Kritikat e ashpra të El-Sayed ndaj qeverisë izraelite provokuan kundërshtim të fortë nga republikanët, por edhe nga disa demokratë të moderuar, si gjatë zgjedhjeve paraprake të partive ashtu edhe gjatë fushatës së fundit zgjedhore.
Pas mesazheve që kishte për Presidenti Trump dhe Zv/Presidentin JD Vanc në fund ai iu drejtua donatorëve të fuqishëm politikë dhe grupeve të interesit që kishin financuar fushatën kundër tij.
“Komiteteve politike dhe grupeve me interes të veçantë që u përpoqën të na mposhtnin, u them: Po vijmë për të ndryshuar sistemin tuaj politik,” seantori i ri demokrat El Sayed duke veçuar AIPAC-un, organizatën me ndikim lobues proizraelitë amerikane që tha se kishte shpenzuar 42 milionë dollarë për fushatën kundër tij.
“AIPAC-ut, e cila shpenzoi 42 milionë dollarë kundër nesh, faleminderit që më dhatë mundësinë t’ju mposht dy herë!”
Në Florida, republikanët kanë arritur të mbajnë disa prej pozicioneve kryesore politike, pavarësisht sfidave të forta nga demokratët në zgjedhjet afatmesme, ndërkohë është zgjedhur edhe guvernatori i parë me ngjyrë në histori.
Republikani Byron Donalds, i mbështetur nga presidenti Donald Trump, është shpallur fitues i garës për Guvernator, ndërsa republikania Ashley Moody ka arritur të ruajë mandatin e saj në Senatin amerikan, vend ky i lënë bosh nga Marco Rubio, pas largimit të tij nga Senati.
Byron Donalds, i cili ka qenë anëtar i Kongresit amerikan që prej vitit 2021, kandidoi për postin e Guvernatorit për të zëvendësuar Ron DeSantis, i cili nuk mund të rikandidonte për shkak të kufizimit të mandateve.
Donalds është një nga mbështetësit e njohur të Donald Trump dhe në vitin 2024 ishte përmendur mes emrave të mundshëm për të qenë kandidat për zëvendëspresident në krah të tij.
