Gjenerali amerikan Osborn dekoron komandantin e FSK-së, Bashkim Jasharin
Komandanti i Forcës së Sigurisë së Kosovës, FSK, Gjenerallejtënant Bashkim Jashari, në shenjë vlerësimi për udhëheqjen dhe kontributin e tij në forcimin e bashkëpunimit ndërmjet dy forcave ushtarake, është dekoruar me dy mirënjohje nga Garda Kombëtare e Iowas në Shtetet e Bashkuara.
Në arsyetim thuhet se Bashkim Jashari është vlerësuar për shërbimin e jashtëzakonshëm dhe udhëheqjen vizionare në krye të FSK-së, në mbështetje të Programit të Partneritetit Shtetëror me Gardën Kombëtare të Iowas.
Angazhimi i tij, përkushtimi personal dhe orientimi strategjik, thuhet në deklaratë, kanë ndikuar në zgjerimin e bashkëpunimit dypalësh në fushën e trajnimeve, ndërveprueshmërisë operacionale dhe zhvillimit profesional të udhëheqësve ushtarakë.
Kontributi i Gjenerallejtënant Jasharit vlerësohet si i rëndësishëm për suksesin e këtij programi, duke forcuar lidhjet ndërmjet shtetit të Ajovës dhe Republikës së Kosovës.
Ndërkaq, Urdhri i Shën Mauricit i është ndarë për kontributin e veçantë në komunitetin e këmbësorisë, si dhe për integritetin, karakterin moral dhe kompetencën e lartë profesionale.
Në arsyetimin e këtij çmimi thuhet se Bashkim Jashari është vlerësuar nga një komision i përbërë nga pjesëtarë me përvojë të këmbësorisë së Ushtrisë Amerikane dhe përkrahës të saj, duke u konsideruar i denjë për këtë njohje të veçantë.
Bashkëpunimi me Gardën Kombëtare të Iowas është një nga shtyllat e rëndësishme të partneritetit të mbrojtjes ndërmjet Kosovës dhe SHBA-së, duke kontribuar në ngritjen e kapaciteteve dhe përgatitjen profesionale të FSK-së.
