Presidenti i ri i ECB, Holanda propozon ish-bankierin Klaas Knot
Ish-Guvernatori i Bankës Qendrore të Holandës, Klaas Knot, është propozuar zyrtarisht për President të Bankës Qendrore Evropiane, ECB. Ai konsiderohet si kandidat i fortë për të zëvendësuar Christine Lagardein.
Holanda ka propozuar ish-kreun e bankës së saj qendrore kombëtare, Klaas Knot, si kandidat për postin e Presidentit të Bankës Qendrore Evropiane, ECB. Kjo u bë e ditur në Parlamentin në Hagë nga Ministri i Financave, Eelco Heinen. Ky post mbetet vakant, pasi Presidentja aktuale e BQE-së, Christine Lagarde, ka njoftuar se do të largohet nga detyra para kohe, në muajin shkurt.
Knot, 59 vjeç, ka shërbyer si President i Bankës Qendrore të Holandës për 14 vjet, nga 1 korriku 2011 deri më 30 qershor 2025. Emërimi i tij pritej gjerësisht; ai konsiderohet si një nga pretendentët kryesorë për këtë post.
Mbështetës i politikës monetare të rreptë
Knot mbron një politikë monetare të rreptë. Brenda Këshillit Drejtues të ECB-së, ai e ka kundërshtuar hapur politikën monetare tejet lehtësuese që ishte në fuqi – një qëndrim që e vendos atë në të njëjtën linjë me qëndrimin e Bundesbankës, Bankës Qendrore të Gjermanisë. Me një doktoraturë në Ekonomi, ai aktualisht shërben si profesor nderi i Ekonomisë së Bankave Qendrore në Universitetin e Groningenit dhe i Stabilitetit Monetar në Universitetin e Amsterdamit.
Kandidatë të tjerë me shanse
Përfliten edhe kandidatë të tjerë për presidencën e ECB-së nga vendet e Eurozonës. Spanjolli Pablo Hernández de Cos konsiderohet si një nga favoritët. Duke filluar nga korriku 2025, ai drejton Bankën për Zgjidhje Ndërkombëtare, BIS, në Bazel – e cila, në njëfarë kuptimi, është “banka qendrore për bankat qendrore”. Më parë, ai ka shërbyer si Guvernator i Bankës së Spanjës (2018–2024), rol në të cilin ishte gjithashtu anëtar i Këshillit Drejtues të ECB-së. Ndryshe nga Knot, Hernández de Cos shihet si mbështetës i një politike monetare më të zhdërvjellët, me norma interesi më të ulëta.
Edhe Presidenti i Bundesbank-ës, Joachim Nagel, kishte shprehur interes për postin kryesor në ECB; megjithatë, gjasat e tij konsiderohen të pakta, duke pasur parasysh se Ursula von der Leyen, e cila është gjermane, mban tashmë një post të nivelit të lartë brenda BE-së: atë të Presidentes së Komisionit Evropian./DW/
