BE pranë heqjes së roamingut për vendet e Ballkanit Perëndimor

Komisioni Evropian ka nisur negociatat për heqjen e roamingut ndërmjet Bashkimit Evropian dhe vendeve të Ballkanit Perëndimor. Qëllimi është përfshirja e rajonit në sistemin “Roam Like at Home”, i cili do t’u mundësonte qytetarëve të përdorin shërbimet celulare në BE pa tarifa shtesë.

Në negociata janë përfshirë Shqipëria, Kosova, Mali i Zi, Maqedonia e Veriut, Bosnje Hercegovina dhe Serbia. Përfshirja në zonën e vetme roaming do të nënkuptonte që qytetarët nga Ballkani Perëndimor mund të bëjnë telefonata, të dërgojnë mesazhe dhe të përdorin internetin ndërsa udhëtojnë në Bashkimin Evropian me të njëjtat çmime si në shtëpi. Të njëjtat rregulla do të zbatohen për qytetarët e BE-së që udhëtojnë në rajon, raporton N1 Info.

Negociatat vijojnë

Iniciativa erdhi pasi presidentja e Komisionit Evropian, Ursula von der Leyen, e bëri të ditur këtë mundësi gjatë vizitës së saj në Ballkanin Perëndimor në tetor të këtij viti. Komisioni konfirmoi se negociatat dypalëshe me partnerët nga rajoni tashmë janë zyrtarisht të hapura.

Në mënyrë që heqja e roaming të zbatohet, vendet partnere duhet të harmonizojnë plotësisht legjislacionin e tyre me rregullat e BE-së. Pasi të jenë lidhur marrëveshjet, Komisioni Evropian do t’i propozojë Këshillit të Bashkimit Evropian që të marrë vendimin përfundimtar për zgjerimin e sistemit. Këshilli i BE-së miratoi fillimin e negociatave që në qershor 2026.

Marrëveshjet e ardhshme për roaming do të lidhen me marrëveshjet ekzistuese të Stabilizim Asociimit, qëllimi i të cilave është të mbështesin stabilitetin, integrimin ekonomik dhe të forcojnë bashkëpunimin e rajonit me Bashkimin Evropian. Komisioni Evropian nuk ka bërë të ditur ende datën e saktë nga e cila rregullat e reja mund të hyjnë në fuqi.