Kurti: Mërgata do të mbështetet përmes kredive për investime në Kosovë

Kryeministri i Kosovës, Albin Kurti, në takim me pjesëtarët e mërgatës shqiptare në Francë, ka diskutuar për përfshirjen më të madhe të diasporës në jetën publike dhe institucionale të Kosovës, si dhe për mundësitë e investimeve në vend.

Albin Kurti tha se përfshirja e mërgatës në institucionet e Kosovës do të kontribuojë në forcimin e tyre, duke sjellë përvojën, ekspertizën dhe kulturën e punës nga shtetet e zhvilluara.

Përmes “Dritares për Investime të Diasporës”, tha ai, do të mbështeten ndërmarrësit nga mërgata që dëshirojnë të investojnë në Kosovë, ku shteti do të jetë garant për kreditë që merren për këto investime.

Kryeministri i Kosovës ritheksoi dhe Programin prej 1 miliard eurosh për prodhim dhe industri, përmes të cilit do të mbështeten projektet strategjike dhe prioritare të industrisë.

Ndryshe, takimi i Kryeministrit të Kosovës, Albin Kurti, me pjesëtarët e mërgatës në Francë u mbajt në prag të pjesëmarrjes së tij në Forumin e Paqes në Paris.