Reforma Zgjedhore/ Ultimatumi i PS, përgjigjet PD: Nuk kemi bojkotuar asnjë mbledhje, mazhoranca po pengon procesin! 

Pas ultimatumit të kreut të Grupit Parlamentar të PS, Taulant Balla, se në rast se opozita nuk e ndalë bojkotin e Komisionit të Reformës Zgjedhore, mazhoranca do ta miratojë Reformën edhe pa opozitën, ka reaguar kreu i Grupit Parlamentar të PD-së, Gazment Bardhi, i cili ka mohuar akuzat e socialistëve, duke deklaruar se opozita nuk ka bojkotuar asnjë mbledhje të Komisionit.

“Opozita nuk ka bojkotuar asnjëherë Komisionin e Posaçëm për Reformën Zgjedhore. Ky është një fakt publik dhe lehtësisht i verifikueshëm. Nuk ka pasur asnjë mbledhje të thirrur të këtij Komisioni në të cilën përfaqësuesit tanë të mos kenë qenë të pranishëm.

Ajo që po ndodh është një përpjekje e mazhorancës për të devijuar dhe penguar punën e Komisionit, duke e zhvendosur vëmendjen drejt çështjeve dytësore, të cilat nuk lidhen me rekomandimet e OSBE/ODIHR-it dhe të Komisionit të Venecias. Ky fokusim në çështje që nuk adresojnë standardet për zgjedhje të lira, të ndershme dhe të barabarta po zvarrit procesin dhe po pengon përmbushjen e detyrimeve që ka Shqipëria për garantimin e integritetit të procesit zgjedhor,” thekson Gazment Bardhi duke shtuar se Opozita do të vijojë të insistojë që Reforma Zgjedhore të përmbushë jo thjesht një detyrim formal apo procedural, por standardet dhe kërkesat e përcaktuara edhe nga Komisioni Europian: rikthimin e besimit të publikut te procesi zgjedhor, garantimin e konkurrencës së ndershme politike dhe mbrojtjen e integritetit të zgjedhjeve,” tha kreu i Grupit Parlamentar të PD, Gazment Bardhi ndërsa përfundoi:

“Reforma Zgjedhore duhet të prodhojë garanci reale për zgjedhje të lira, të ndershme dhe të barabarta, jo të shndërrohet në një proces formal që shmang adresimin e problemeve themelore të demokracisë zgjedhore në Shqipëri.”

Ndryshe, sot kreu i Grupit Parlamentar të PS, Taulant Balla, i ka bërë thirrje Partisë Demokratike që të heqë dorë nga bojkoti i Komisionit të Reformës Zgjedhore dhe të rikthehet në tryezën e diskutimeve, ndërsa e bëri të qartë se nëse nuk arrihet një dakordësi me opozitën, socialistët do ta miratojnë Reformën në mënyrë të njëanshme.

“Data 30 nëntor është afati i fundit i Komisionit të Zgjedhores. PS nuk do të mbështesë zgjatjen e afatit. Nuk mund të ripërsërisim të njëjtin skenar të pisët që bëhet kundër agjendës europiane të vendit. 84 vota i kemi dhe do ta miratojmë në mënyrë të njëanshme. Nuk na mban dot peng askush”