Ikin nga Lëvizja Vetëvendosje për të krijuar një parti të re me socialdemokratët e vjetër

Ata që ikën nga Lëvizja Vetëvendosje, vendosën të krijonë parti të re duke rimëkëmbur një parti të vjetër në Kosovë, të themeluar në vitin 1990, Partinë Socialdemokrate të Kosovës, duke e marrë udhëheqjen e saj përmes një Kuvendi të jashtëzakonshëm të mbajtur sot.

Kryetari i ri i Partisë Socialdemokrate të Kosovës, Shpend Ahmeti, pas marrjes së besimit të delegatëve, tha se nuk duhet dhe nuk do të lejojnë ndasi e diskriminime, por do të kërkojnë drejtësi dhe demokraci për të gjithë.

Kosova trajtohet gjithmonë e fundit nga Evropa, tha ai, sepse Kosova nuk është më kriminele se Serbia, më të korruptuar se Maqedonia dhe më të varfër se Shqipëria, andaj duhet ta trajtojë të barabartë.

“Kjo është ajo për të cilën duam të luftojmë, për normalitet, për barazi, që të konsiderohemi të barabartë me të tjerët, jo vetëm si individ, por edhe si shoqëri. Sepse as për nga e kaluara nuk kemi bërë kurrfarë gjëra të këqija asnjë shteti fqinjë, asnjë shteti mik, e as askujt që të trajtohemi në mënyrë të tillë dhe të pabarabartë. Por së pari duhet të luftojmë për socialdemokracinë brenda shtetit tonë. Dhe, pikërisht është deklarata e Schumanit e vitit 1950 me të cilën u krijua BE-ja, kur pas luftës së dytë botërore Franca dhe Gjermania duke u diskutuar dëmet që ishin shkaktuar nga lufta e dytë, e vetmja mënyrë për Evropën që të ecë përpara është përmes prodhimit dhe bashkimit në prodhim dhe e kanë quajtur përmes solidaritetit në prodhim”, tha Ahmeti.

Ai foli për idealet e gjeneratës së re, për të cilën tha se nuk është se nuk kanë ideale, porse ato duhet konkretizuar. Sipas tij, në 20 vitet e fundit është bërë virtyt maksimizimi i interesit personal, sepse kjo çmohet kur dikush ka maksimizuar interesin personal. Madje, sipas Ahmetit, kjo është kthyer edhe në qëllim kolektiv.

“Pra, gjenerata e re nuk është pa ideal, gjenerata e re nuk është se nuk ka kreativitet, gjenerata e re nuk është se nuk jeton me problemet që i ka, mirëpo, na nevojitet një konkretizim i këtyre idealeve, na nevojitet që këtë rini ta bashkojmë rreth këtyre idealeve, pra atë qëllim që e kanë dhe atë ideal ta konkretizojmë më mirë dhe ta themi të gjithë bashkë, sepse unë besoj se ne socialdemokratët jemi shumicë. Demokracia sociale beson në të mirën kolektive, e këtu me duhet të ju them se shpresoj që asnjëri nga ju nuk sëmureni, por po ashtu të gjithë ne besojmë se kur të sëmureni do të keni mundësi të shëroheni. Prandaj, secili prej neve këtu besojmë se duhet të angazhohemi në mënyrë kolektive që ta gëzojmë këtë të mirë kolektive e natyrisht edhe individuale”, tha Ahmeti.

Sipas kreut të PSD-së, diskursi i 20 viteve të fundit është i rrejshëm, pasi taksat e ulëta nuk janë në fakt taksa të ulëta. Madje sipas Ahmetit, ajo është rrenë, sepse qytetarët paguajnë dhjetë për qind, por taksat që i paguhen shtetit janë shumë më të madhe, pasi nëse dikush sëmuret atëherë duhet t’i paguajë barërat për shkak të mungesës së sigurimeve shëndetësore.

Në kuvendin e jashtëzakonshëm janë zgjedhur edhe nënkryetari dhe sekretarja e re e PSD-së. Nënkryetar i ri i PSD-së, është zgjedhur Visar Ymeri, derisa sekretare e përgjithshme, Aida Dërguti.

Nënkryetari Ymeri, teksa ka folur për synimet e tyre, ka theksuar se për skenën politike po nis një epokë e re.

“Kjo është një ditë e madhe për PSD-në, për të gjithë ne, të cilët i ndajmë e i përqafojmë vlerat e lirisë, barazisë, solidaritetit e të mirëqenies, sepse që nga sot do të nisë një etapë e re për skenën politike në Kosovë e për socialdemokracinë në Kosovë, e cila do ta fuqizojë e do ta avancojë këtë koncept politik e këtë bindje politike, e këtë konglomerat vlerash politike të cilat janë të domosdoshme për Republikën e Kosovës, për ta rritur kështu në këtë republikë edhe demokracinë, edhe sovranitetin, edhe zhvillimin, edhe mirëqenien, edhe arsimin, edhe shëndetësinë, për të gjithë qytetarët e Republikës së Kosovës”, tha Ymeri.

Një fjalë të shkurtër ka mbajtur edhe kryetari i deritashëm i PSD-së Bajram Kelmendi, i cili tha se kanë mirëpritur iniciativën e Grupit të Deputetëve të Pavarur, që lanë Vetëvendosjen, për bashkimin me PSD-në.