Ta ndalim dorën gjakatare të Edi Ramës…

Ata janë të vendosur për ta vrarë shpresën dhe jetën e këtij qyteti!

Asht një vendim i kahershëm i tyre: hakmarrje ndaj bashkësisë, që guxoi të sfidonte pandërprerë mitin e përjetësisë së etërve të kuq.

Ajo çfarë ndodhë këto ditë në Shkodër, është veç maja e ajsbergut e dhunës, terrorit të fshehtë, derë më derë, vesh më vesh, që ndodhë çdo ditë në heshtje këtu, dhe që po e vdes shpresën për ringritje. Skuadra të tëra këmbëshpejtish, individë të huazuar, që hyjnë dhe dalin pa u ndjerë dhe pa u njohur nga askush, lëvizin çdo ditë dhe natë, qoshkave të errëta të Shkodrës së zënë peng.

Është një seri e paralajmëruar me kohë prej nesh, që nuk mund të injorohet nga asnjë vajtim. Nuk është një serial kriminal i verës 2018, por është eksplodimi dhe dalja jashtë kontrolli, e rendit të gjërave të nëntokës së qeverisjes, që kryetari i PS filloi të ndërtonte fshehurazi, në pranverën e parë te “Rilindjes”, në kohën e zbaticës që lanë pas, “dalëzotsat” dezertorë të krahinës.

Nuk kemi të bëjmë thjeshtë me disa ngjarje, por me një sistem kriminal të përhapur në të tërë Shqipërinë, të drejtuar nga Kryeministri i vendit, përmes pashallarëve socialistë, që në Shkodër ka tejkaluar çdo limit të parashikuar edhe nga vetë ideatorët e regjimit të frikësimit. Shkodrës, Byroja e Partisë, bazuar mbi parimin e vazhdimësinë, i solli pinjollin e vogël, të shërbëtorit të vjetër të pushtetit perandorak të Kmerëve.

Është ajo skilja e vogël që kinse “udhëheq” hapjen e bisedimeve me BE. Ai sot hesht dhe fshihet, e së bashku me të, i gjithë entourage që i shkoi pas për vite me radhë, me gëzimin fëmijnor hakmarrës.

Është një sistem i ndërtuar nga Bunkeri i Surrelit, enkas për të blerë dhe mbajtur pushtet politik, ekonomik, financiar; një ushtri e tërë paraushtarakësh, të komanduar nga nëntoka e pushtetit të PS, që shërben për të zaptuar toka, kontrolluar trafiqet, ndërtuar hidrocentrale, koncensionuar inceneratorë; një rrjet i tërë i shpërndarë, për të grabitur me bekimin e ligjit të mazhorances, çdo centim të parasë dhe pronave publike, nga fondet qendrore deri te ato lokale, nga terrenet teatrore deri tek organizatat sportive vllaznore; një sistem i tërë i kompromentimit galopant të individëve me pushtet, të fshikulluarve, që nuk mund të lahen dot me tre fjali propagande konsumuese; një kamzhik vrastar që hesht fjalën e lirë dhe vendos në ikje qytetarin e thjeshtë që nuk bzan. Ai prek të gjithë, edhe socialistet e thjeshtë, që nuk duhet të bëhen më palë me kurthaxhinjtë e pushtetit të Tiranës, për një kafshatë buk, që ua lëshojnë në këmbim të rreshtimit.

Është koha për t’u bashkuar të gjithë ndaj partisë sonë që asht SHKODRA, Shtëpia Jonë e Përbashkët.

Është koha e qëndresës, që paraardhësit tanë, në kohë më të vështira, e kanë përballuar me bashkim, urtësi dhe orientim nga miqtë e vërtetë.

Mijëra bashkëqytetarë tanë janë me ne që kemi mbetur në këtë anë, që është toka jonë, e tyre, e atyre që nuk jetojnë më dhe na e kanë lanë për ta mbrojtur. Dhe ne do ta mbrojmë, të gjithë së bashku, si shkodranë.

Unë ju bëj thirrje për qëndresë dhe bashkim.

Ne nuk do ta lëshojmë Shkodrën tonë.

Bashkëqytetarët tanë më të shquar në Vendin e Lirë po bëjnë në këtë moment çdo gjë në dorë të tyre, për të ndalur dorën gjakatare të Edi Rames, Fatmir Xhafajt dhe Ditmir Bushatit, mbi kryeqytetin e krenarisë shqiptare, të bukurën e dheut, që sot lëngon nga suksesi i përkohshëm i pabesisë së pushtetit.
Për vemendjen e #USEMBASSYTIRANA