Ja çfarë deklaronte Edi Rama më 5 gusht 2016 për vëllanë e Fatmir Xhafajt

Kryeministri Edi Rama ka mbrojtur sot në seancë parlamentare ministrin e tij të Brendshëm, Fatmir Xhafaj, lidhur me akuzat e opozitës, pas publikimit të vendimit të Gjykatës së Kasacionit të Italisë, që e dënon Agron Xhafajn me 7 vjet dhe 2 muaj burg.

Sot Rama mbrojti Xhafajn duke përmendur BE dhe ambasadorin amerikan, të cilët nuk kanë shprehur shqetësime sipas tij, dhe nëse do të kishte diçka të vërtetë do të reagonin.

Por në mbrojtje, Kryeministri e ka marrë vëllain e ministrit të Brendshëm edhe në 2016, kohë kur Fatmir Xhafaj, drejtonte Komisionin për Reformën në Drejtësi.

Ja çfarë deklaronte më 5 gusht 2016 Edi Rama

“Saliu e ka ndërmarrë fushatën e tij të ndyrë të radhës këtë herë, për të baltosur Fatmir Xhafajn! Dhe në stilin e tij të vjetër e të neveritshëm bolshevik, ka ngritur një akuzë mbi një histori të sajuar këmbë e krye, për të vëllanë e Fatmirit. Një histori me drogë venezuelane, për babain e dy fëmijëve që është në punën e tij të ndershme dhe ka vetëm një faj: Eshtë vëllai i njeriut që drejton Komisionin e Posaçëm Parlamentar për reformën më të rëndësishme dhe më të vështirë të 25 vjetëve të fundit!”

Dje, pas bërjen publike të dosjes së plotë të dënimit të Agron Xhafajt në Itali, ministri i Brendshëm Fatmir Xhafaj e pranoi publikisht se vëllai itij ka qenë i përfshirë në trafik ndërkombëtar lëndësh narkotike, por shtoi se ky dënim nuk ka asnjë lidhje me karrierën e tij politike.