Kosova e nis mbarë Ligën e Kombeve, merr një pikë në Azerbajxhan

Në ndeshjen e parë në Ligën e Kombeve, përfaqësuesja e Kosovës merr pikën e parë duke luajtur barazim 0-0 ndaj Azerbajxhanit në Baku.

Pjesa e parë nisi me një ritëm të ngadaltë nga të dy skuadrat, me Kosovën që me një përqindje pak më të lartë zotronte posedimin e topit. Loja u përqendrua më shumë në mesfushë, dhe vetëm në fundin e saj, dy tentativa nga Celina dhe Muriqi, i futën frikën azerëve, por gjithsesi nuk patën shënjestrën e duhur.

Në pjesën e dytë, ishin vendasit që patën më shumë iniciativë, dhe provuan më shumë drejt portës së Ujkanit. Kjo shtyu trajnerin Bernard Challandes që të bëjë dy zëvendësime, duke inkuadruar Rashicën dhe Avdijajn, në vend të Zhegrovës dhe Celinës. Por pavarësisht këtyre ndryshimeve, Azerbajxhani vazhdoi të dominonte ndeshjen, dhe deri në fund, rrjeta mbeti e paprekur.

Kosova merr kështu pikën e parë, ndërkohë që në Grupin 3 në Ligën D, gjenden edhe Malta e Ishujt Faroe.

Ndeshjen e radhës, “Dardanët” e luajnë ndaj Ishujve Faroe, ditën e hënë, më 10 shtator në stadiumin “Fadil Vokrri” në Prishtinë.