Mark Frroku fiton lirinë me kusht
Mark Frroku, ish-deputet, ka fituar lirinë. Mark Frroku ishte dënuar me 7 vjet e 6 muaj burg për fshehje të pasurisë, pastrim parash dhe ndërtim të paligjshëm.
Gjykata e Fierit ka marrë vendim ditët e fundit, për t’i falur Mark Frrokut rreth 1 viti e 5 ditë burg nga pjesa e dënimit që i kishte mbetur për të kaluar në qeli, duke i dhënë lirinë me kusht.
Frroku është ndaluar në vitin 2015.
Ish-deputeti u dënua në prill të vitit 2017, nga Gjykata e Shkallës së Parë në Tiranë. Në janar, ai apeloi vendimi ky Gjykata e Apelit në Tiranë e uli dënimin në 6 vjet. Ndërsa, tashmë Gjykata e Fierit ka urdhëruar lirimin e menjëhershëm të tij.
Mark Frroku është akuzuar më herët edhe për vrasjen e shqiptarit Aleksandër Kurti, ngjarje e ndodhur në vitin 1999 në Belgjikë. Ai i ka mohuar këto akuza, të cilat nuk u faktuan kurrë se Frroku të ishte autor. Kurti dyshohet të jetë vrarë për konflikte që kanë lindur mbi shfrytëzimin e territoreve për ushtrimin e prostitucionit në Belgjikë.
Por ndërsa tashmë fiton lirinë, Mark Frroku do të përballet javën e ardhshme me një tjetër proces gjyqësor, në Gjykatën e Tiranës. Bëhet fjalë për akuzat e një dëshmie të rremë, që Frroku ka dhënë në lidhje me një atentat të mundshëm ndaj Tom Doshit, që u pretendua të kryhej nga Durim Bami nga Fushë-Kruja.
