Vettingu i Politikanëve/ PD, Salianji: Nuk ka negociata. PO ose JO!
Pas mbledhjes së Grupeve parlamentare PD dhe LSI, lidhur me nismën për Vettingun e politikanëve, deputeti i Partisë Demokratike, Ervin Salianji tha se për këtë çështje nuk ka negociata, por vetëm Po ose Jo!
“Është e qartë se pas depozitimit të projektligjit për ndryshimet kushtetuese nga ana jonë për të bërë të mundur Vettingun e politikanëve, Rama dhe PS po e refuzon Vettingun,” Ervin Salianji duke sqaruar se opozita ka depozituar në Kuvend një projektligj që mundëson ndryshimet kushtetuese për të larguar të gjithë funksionarët e lartë publik që kanë lidhje me personat e inkriminuar duke nisur nga drejtuesit e institucioneve kushtetuese, Kryeministri, deputetët, kryetarët e bashkive dhe çdo funksion tjetër. Dhe, nuk e shmang Vettingu i politikanëve, hetimin nga drejtësia
“Gjithë propaganda që bëhet nga PS dhe Rama është për t’iu shmangur Vetingut të politikanëve. Vettingu është një proces paralel që ecën bashkë me hetimin nga drejtësia. Nuk e shmang Vettingu i politikanëve, hetimin nga drejtësia. Përkundrazi, e përshpejton, e ndihmon dhe largon personat e inkriminuar apo personat e lidhur me krimin nga institucionet publike.
Edhe sot nuk ndalohet që SPAKu apo Prokuroria e sotme të hetojë familjarë të politikanëve apo funskionarëve publikë, e pengon vetëm vullneti i Kryeministrit dhe e një drejtësie të kapur prej fyti nga kryeministri,” tha deputeti i Partisë Demokratike duke saktësuar se sikur të ekzistonte vullneti politik i Edi Ramës mund të gjendet çfarëdo hapësirë proceduriale për ta votuar sa më shpejt dhe kaluar sa më shpejt në të gjithë komisionet apo seancë parlamentare.
Sot ka një diskutim nëse do apo nuk do! Nëse PS dhe qeveria nuk e do Vetingun dhe e refuzon, atëhërë nuk mund të diskutojmë për teknikalitete të cilat janë të parakohshme, tha deputeti i Partisë Demokratike, Ervin Salianji duke përfunduar:
“Vendimi ynë i sotëm është që ne do të pranojmë apo diskutojmë çfarëdo lloj hapi. Nuk ka negociata, por vetëm po ose jo! Nëse do të ketë PO, do të shpalosim të gjtiha hapat e mëtejshme.”
