E FRIKSHME/Kujdes nuk është droga, Interpoli: Ky është burimi kryesor i të ardhurave të krimit të organizuar…

Nuk është droga, armatimi, prostitucioni, Shteti Islamik. Para syve tanë, “krimi ekologjik” vetëm përflitet dhe ndodhë çdo ditë në masë të madhe, por Raporti i fundit i Interpolit thekson se shfrytëzimi pa kontroll i mjedisit është bërë burimi kryesor i të ardhurave nga krimi i organizuar, duke zëvendësuar kështu trafikun e drogës.

Trafikimi i fildishit, nxjerrja e arit dhe “tatimet” e paligjshme në burimet natyrore si dhe vepra të tjera kriminale, përbëjnë 38 për qind të të ardhurave me të cilat financohen konfliktet dhe grupet e armatosura, thekson Raporti i Interpolit.

Dhe, derisa grupimet siç është Shteti Islamik dominojnë në faqet e para të mediave botërore, ato përfshijnë vetëm 31.5 miliardë dollarë të përfituara në zonat e konfliktit në gjithë botën, çdo vit. Pjesa tjetër i takon grupeve të krimit të organizuar.

Raporti, të cilin e kanë përgatitur Qendra norvegjeze për Analizën e Rrezikut, RHIPTO dhe Iniciativa Globale për luftën kundër krimit të organizuar transnacional, është pasqyra e parë globale e rrugëve të trafikut që përdoren nga grupet e këtilla. Aty citohen rreth 1000 rrugë të cilat i përdorin trafikantët nga nafta, ari e deri tek diamantët e droga, qeniet njerëzore dhe fildishi.

“Krimi i organizuar gjithnjë e më shumë po minon paqen, sigurinë  dhe zhvillimin,” tha Drejtori i Iniciativës Globale për luftë kundër krimit të organizuar transnacional, Mark Shaw.

“Ky është bërë fenomen global, i përfaqësuar në konfliktet nga Afrika deri në Lindjen e Mesme dhe Amerika,” tha Shaw.

Nxjerrja ilegale e mineraleve përbënë 17 për qind të të ardhurave nga grupet e armatosura, e ndër më të preferuarat janë ari nga lindja e RD Kongo dhe minerali koltan (për celular) në Amerikanë Latine.

Grupet e krimit të organizuar merren edhe me tregtinë shumë fitimprurëse të fildishit nga Afrika dhe brirët e hipopotamit që shiten në Azi për mjekësi popullore, por në Raport theksohet se 165 milionë dollarë të fituara me këtë lloj tregtie përbënë një pjesë të vogël të të ardhurave të tyre.

Pas “krimit ekologjik”, trafiku i drogës vazhdon të jetë burimi i dytë i të ardhurave me 28 për qind nga shumë e përgjithshme, thekson Raporti.

Tatimi i legal i civilëve, plaçkitjet dhe haraçi përfshijnë 26 për qind të të aradhurave të grupeve kriminale.

Nga ana tjetër, donacionet dhe rrëmbimet për shpërblime, janë vetëm 3 për qind e këtyre të ardhurave.

Drejtori i Qendrës RHIPTO, Christian Nellemann, tha se qeveritë duhet ta kuptojnë se lufta kundër krimit të organizuar është faktori kyç për të ndihmuar në dhënien fund të konflikteve.

“Në shumë raste, grupet kriminale, prej të cilave disa janë të lidhura ngusht me elitat politike, mund të kenë interesa në vazhdimin e konflikteve të armatosura në mënyrë që të sigurojnë dominimin e tyre ndaj burimeve natyrore dhe rrugëve të tregtisë,” tha Nelleman.

Raporti zbulon se këto grupe militantësh vjelin tatimin nga civilët.

Nga mesi i vitit 2017, Shteti Islamik ka vjelur rreth 10 milionë dollarë në formë tatimi nga territori të cilin e kishte nën kontroll në Irak dhe Siri.

“Sot, duke pasur parasysh humbjen dramatike të territorit, Shteti Islamik me siguri ka vetëm një të katërtën e kësaj shume,” thekson ai duke shtuar se megjithatë kjo organizatë ka “rezerva të konsiderueshme”.

Talibanët e Afganistanit, gjithashtu, gjatë vitit të kaluar kanë përfituar nga 75- 95 milionë dollarë nga taksimi i heroinës dhe kulturave tjera bujqësore.

Në Somali islamikët e Shababit të lidhur me Al Kaedan përfitojnë rreth 10 milionë dollarë në vit nga taksimi i të gjithë artikujve, duke filluar nga gjëja e gjallë deri tek uji i pijshëm ose duke marr haraç për mbrojtje nga kompanitë.

Militantët kanë madje edhe “mbledhësit e tatimit, të cilët identifikohen nga uniformat,” thekson Raporti.

Trafiku i qenieve njerëzore gjithashtu është burim fitimprurës i financimit të grupeve të armatosura dhe atyre të krimit të organizuar, duke u renditur si puna e katërt më e madhe kriminale në botë me vlerë prej 157 miliardë dollarë, thekson Raporti.

Kontrabandimi i emigrantëve përmes Saharas i sjellë grupeve të armatosura një fitim, prej 765 milionë dollarë në vit, vlerëson Raporti.

Me publikimin e këtij Raporti, Shqipëria dhe mjedisi i saj do të jenë zona shumë më të rrezikuara. Në këtë vend ku sundon krimi i organizuar dhe paligjshmëria e ka emrin shtet, nga ky Raport mund të kuptohet se prej nga vijnë pasuritë e atyre që sot në përditshmëri po quhen oligark, dhe janë niveli më i ulët i shoqërisë. “Krimi ekologjik” është veprimtaria e tyre bazë…