Policia: Situatë e qetë në Veri, barrikada e serbëve është larguar

Situatë e qetë po mbizotëron sot në veri të Kosovës, pas ngjarjeve të djeshme që pasuan me vizitën e presidentit Hashim Thaçi në Ujman.

Zv/drejtori i policisë për rajonin e Mitrovicës Veriore, Besim Hoti, tha sot se barrikadat e vendosura nga banorët serbë në Zubin Potok janë hequr mbrëmë rreth orës 22:00.

“Ka qenë vetëm një barrikadë, ajo në Zubin Potok, dhe ajo është hequr rreth orës 22:00, ndërkaq situata sot në veri është stabël dhe nuk ka ndonjë zhvillim,” tha Hoti.

Ndërsa kryetari i komunës, Zubin Potok, Stevan Vulloviç tha për Agjencinë serbe të lajmeve SRNA se barrikada do të vendoset sërish nëse do të informohen për çfarëdo lloj lëvizje të pjesëtarëve të Njësisë speciale ROSU, qindra prej të cilëve, tha ai, ishin dje në liqenin e Ujmanin për të garantuar sigurinë e vizitës së Hashim Thaçit.

Ndryshe, shëtitja e pakuptimtë e Hashim Thaçit nëpër liqenin e Ujmanit, HEC-i i të cilit prodhon dhe vazhdon të jetë i lidhur vetëm me sistemin energjetik të Serbisë, për Thaçin ishte një shëtitje nëpër bukuritë natyrore të Kosovës ndërsa për presidentin e Serbisë, Aleksander Vuçiç, si provokim të rëndë për të cilin ai kishte urdhëruar edhe nivelin më të lartë të gatishmërisë si për  ushtrinë ashtu edhe policinë, që sipas Kushtetutës së Serbisë është nivel në prag të shpërthimit të luftës.