Podgoricë, zhvillohet takimi i partive shqiptare. Ja dhe vendimet…

Në Parlamentin e Malit të Zi u zhvillua takimi i parë i kryetarëve të partive shqiptare në Mal të Zi ku temë e bisedimeve ishin reformat zgjedhore, raporton Ulqinionline.

Deputeti Nimanbegu i njoftoi të pranishmit me Vendimin mbi themelimin e Grupit punues pranë Parlamentit, që do të merret me përmirësimin e ambientin zgjedhor në Mal të Zi.

U vlerësua qe ligji aktual zgjedhor është diskriminues ndaj përfaqësimit autentik të shqiptarëve, që prej katër deputetëve sa kishim në vitin 2011 pas dy cikleve zgjedhore e zvogëloi numrin në një deputet të vetëm.

Të pranishmit njëzëri përshëndetën nismën për takime dhe i dhanë përkrahje iniciatives e cila do te rezultojë me përmirësimin e marrëdhënieve në mes të partive politike shqiptare si kusht për përmirësimin e pozitës së shqiptarëve në Mal te Zi. Gjithashtu u dha mbështetje përfaqësuesit ne Grupin e ardhshëm punues për reforma zgjedhore për prezantimin e kërkesave të shqiptarëve.

U vendos që  të vazhdohet me takimet e subjekteve politike shqiptare dhe ngritjen e një forumi, i cili do të nisë hapat e përafrimit të politikës dhe qëndrimeve e të gjitha subjekteve politike shqiptare në Mal të Zi.

Në mbledhje morën pjesë kryetari i Lëvizjes Qytetare Perspektiva, Amir Hollaj,   Saubih Mehmeti (në emër të kryetarit Mehmet Bardhi) – përfaqësues i LDMZ, kryetari i Unionit Demokratik të Shqiptarëve, Mehmet Zenka, kryetari i Alternativës shqiptare,Nik Gjeloshaj,  kryetari i Forcës së Re Demokratike, Nazif Cungu  si dhe kryetari i Këshillit kombëtar të shqiptarëve në Mal të Zi,Faik Nika.

Takimi u mbajt me ftesën e Nënkryetarit të Parlamentit të Malit të Zi, Genci Nimanbegut.