Pas zgjedhjeve në SHBA, Kremlini: Nuk mund të bëhet më keq!

Zëdhënësi i presidentit rus, Vladimir Putin, tha se marrëdhëniet me Shtetet e Bashkuara nuk mund të përkeqësohen më, por sugjeroi se edhe perspektivat për përmirësimin e tyre janë të vështira, raporton RFE.

“Gjithçka është e vështirë”, tha Peskov pasi u pyet nga gazetarët nëse rezultati i zgjedhjeve të 6 nëntorit në SHBA mund t’i komplikojë marrëdhëniet e Moskës me Washingtonin.

Dmitry Peskov i bëri këto komente pas zgjedhjeve për Kongres në SHBA, ku Partia Demokrate fitoi shumicën e ulëseve në Dhomën e Përfaqësuesve, ndërsa Partia Republikane e presidentit Donald Trump rriti shumicën në Senat.

Peskov nuk parashikoi se marrëdhëniet do të përkeqësohen më tej, por tha se “mund të sugjerohet me një siguri të lartë se perspektivat rozë për normalizimin e marrëdhënieve ruso-amerikane, nuk janë të dukshme në horizont”.

“Ka shumë çështje që kërkojnë komunikim ruso-amerikan – çështjet e stabilitetit strategjik dhe kontrollit të armëve. Këto çështje nuk do të zhduken vetvetiu, pa komunikim”, tha Peskov.

Marrëdhëniet SHBA-Rusi janë tensionuar pasi Moska aneksoi gadishullin ukrainas të Krimesë në vitin 2014. Washingtoni po ashtu dyshon se hakerët rusë kanë ndërhyrë në zgjedhjet presidenciale në SHBA më 2016.