Edi Rama me celular në dorë, Përgjigje Metës: Për presidentin edhe një relacion i detajuar shpjegues…

Pasi Presidenti i Republikës i sqaroi sërish kryeministrit arsyet e mosdekretimit të ministrit të Brendshëm, Sandër Lleshi, Edi Rama që dihet se gjatë gjithë kohës shkruan mesazhe me celular, iu përgjigj Ilir Metës përmes rrjetit social Twitter:

“Sapo kam rifirmosur për ridërgim kërkesën për dekretimin e Sandër Lleshit Ministër i Brendshëm, drejtuar Presidentit të Republikës. Bashkëngjitur do t’i dërgohet Presidentit edhe një relacion i detajuar shpjegues, në funksion të dekretimit të Ministrit të Brendshëm.”

Ndryshe, Ilir Meta pasi morri pjesë në Forumin “Tirana Connectivity”  u pyet nga gazetarët nëse do ta dekreton Sandër Lleshin si Ministër të Brendshëm, pasi Kryeministri paralajmëroi një ditë më parë se do ta dërgojë sërish emrin e tij, Presidenti ishte i relaksuar pas kthimit nga Italia në realitetin shqiptar:

Presidenti Meta: Forumi “Tirana Connectivity” i mbajtur sot ishte i mrekullueshëm dhe besoj se interkonektiviteti duhet të rrezatojë kudo.

Pyetje: A keni një arsye ligjore për mosdekretimin e z. Lleshi si ministër? Jo bindje, arsye ligjore…

Presidenti Meta: Përsa i takon anës ligjore pa dashur të jap leksione për Kushtetutën, por të gjithë amatorët, diletantët apo atyre që janë të njëanshëm, do t’i ftoja edhe një herë të lexojnë Kushtetutën,
kompetencat e Presidentit dhe se akt formal apo ceremonial është vetëm betimi te Presidenti.

Dhe të gjithë atyre, që mendojnë se dekretimi nuk është një akt substancial dhe individual, por formal dhe se Presidenti ka detyrë vetëm të firmosë një propozim në këtë rast, pasi në Kushtetutë nuk thuhet në mënyrë eksplicite që Presidenti mund të kthejë mbrapsht një propozim, kam një pyetje tjetër: A mundet Parlamenti të rrëzojë dekretin e Presidentit për një ministër? Sepse edhe kjo nuk është e shprehur në mënyrë eksplicite në Kushtetutën e Republikës së Shqipërisë. Kështu që, më lini të bëj detyrën time me përgjegjshmëri të plotë, si gjithmonë.