“Mafia e ndërtimit”/ Denoncimi, Paloka: Kriminelë ordinerë kërcënojnë natën banorët të largohen nga Unaza e Re!
“Natën vijnë kriminelë, kriminelë ordinerë që siç duket kanë marrë premtime për të ndërtuar pallate kur të largohen këta banorë, vijnë dhe kërcënojnë banorët. Ma thanë para 5 minutash banorët.” Ky është denoncimi më i ri që vjen nga Nënkryetari i Partisë Demokratike, Edi Paloka, dhe sqaron se pse i gjithë aparati shtetëror është i angazhuar me mjetet e tij represive në Unazën e Re kur tashmë “mafia e ndërtimit” del edhe zbuluar.
“Dhuna nuk është ndonjë e re për këtë regjim. Është një regjim që për interesat e xhepit të Edi Ramës nuk merr parasysh asgjë, as strehën e fëmijëve, as shëndetin e të sëmurëve që kanë futur kokat në këto strehë. Shiheni! Kanë ngritur gjithë Policinë në këmbë. Krimi bën qejf, krimi bën kërdinë, ky ngre gjithë Policinë kundër banorëve të kësaj zone që në fund të fundit po mbrojnë një të drejtë që ia jep jo vetëm Kushtetuta, ia jep e drejta njerëzore,” tha Edi Paloka nga Unaza e Re duke konstatuar pas vizitës së fundit që bëri sot tek familjet e prekura nga projekti i Unazës së Madhe, një situatë të mjerueshme që ka krijuar Edi Rama me Erion Velinë:
“Çdo histori e tyre është një dhimbje më vete. Fëmijë që ngelin në rrugë sepse prindërit ua marrin në Polici; fëmija 8-vjeçar që dëgjuat edhe në gjykatë, kishte ngelur rrugëve se ia kishin marrë prindërit. Njerëz që kanë invalidë nëpër shtëpi dhe nuk dinë ku t’i fusin kokat. Kjo është ana njerëzore. Dhe pse ndodh kjo?! Sepse një mostër që ne kemi për kryeministër, i pangopur bashkë me këtë “velinën” e bashkisë kërkojnë të fusin miliona të tjera në xhep. Këtu është krimi bashkë me Edi Ramën.”
“Vijnë natën me xhama të zinj, me makina të maskuara dhe u bëjnë presion banorëve. Kriminelë ordinerë! Me siguri janë pjesë e atyre që do të marrin lejet për pallate, nesër. Kjo po ndodh këtu. Vazhdon ashkëpunimi i politikës me krimin, nuk pyetet për fëmijët dhe e thashë, Edi Rama dhe Erion Veliaj janë gati të bëjnë gjithçka. Ndjenja njerëzore nuk kanë më ata, po s’njohin as ligj, as Kushtetutë,” tha Nënkryetari i Partisë Demokratike, Edi Paloka, duke shtuar se këta banorë kanë të drejtë të rrinë në shtëpitë e tyre dhe në asnjë mënyrë nuk ka për t’i nxjerrë Edi Rama nga shtëpitë.
