Bora pushton Shqipërinë. Pezullohet mësimi, lëvizja e kufizuar në…

Mëngjesi i sotëm në shumë zona të vendit ndonëse është zgjuar me reshje shiu, pasoja e reshjeve të borës ende nuk janë rikuperuar.

Kështu, pas reshjeve të dendura të borës, Bashkia  e Shkodrës informose se ka ndërprerje të furnizimit me energji në disa fshatra si Dajç dhe Berdicë, ndërsa furnizimi me ujë të pijshëm është normal, pa probleme.

Sa i përket kalueshmërisë së rrugëve raportohet:

Rruga e Thethit e pakalueshme.
Rruga për në Breg Lumi e bllokuar në segmentin rrugor Kir-Mali i Shoshit. “Mali Shoshit ka mbi 80 cm bore dhe reshjet vazhdojnë”.

Po ndërhyhet ne rrugët Boks, Dragoc, Kullaj, Myselim, Drisht (NJA Postribe).

Funksionimi i shkollave.

Procesi mësimor nuk është zhvilluar normalisht për shkak të numrit të vogël të nxënësve në shkolla. Raportohet të jete nderprere për tre NJA-të e thella malore, Shalë, Shosh dhe Pult.

Funksionimi i institucioneve te kujdesit shendetësor.

Në përgjithësi kanë funksionuar normalisht në pjesën më të madhe të territorit të Bashkisë përjashtuar njësitë e thella malore.
“Nuk ka fare sherbim shëndetësor” në Pult.
“Mungon shërbimi shëndetësor” në Shosh.

Mjete dhe burime njerëzore të vena në dispozicion.

Janë përfshirë në operacionin e pastrimit të rrugëve dhe shesheve burimet njerëzore dhe mjete teknike të Bashkisë Shkodër dhe ndërmarrjeve të varësisë se saj, specialistë të sherbimeve publike dhe emergjencave civile, Ujësjellës- Kanalizimeve dhe sipërmarrjes private të aktivizuara nga Bashkia Shkodër.

Gjashtë (6) fadroma po punojnë në të gjithë territorin e qyetit Shkodër.
Po ashtu janë në punë 3 grejdera, të cilët bëjnë pastrimin e segmenteve me problematike rrugore, 1 borëpastruese, 1 mjet fadromë në rrugët e brendëshme të Postribës, 1 fadromë në segmentin rrugor të Prekal.

Po vazhdon hedhja e kripës në trotuaret e qytetit.

Punonjës të sherbimeve të tjera po bëjnë pastrimin e trotuareve. U është bërë thirrje qytetarëve dhe bizneseve të kontribuojnë në pastrimin e hapësirave që kanë në përdorim

Pukë. Reshjet e borës kanë paralizuar qarkullimin në gjithë fshatrat e Pukës. Për pasojë, procesi mësimor ditën e sotme është pezulluar.

Dibër.Edhe qarku i Dibrës është i bllokuar në rrugët e fshatrave dhe trashësia e dëborës arrin deri në 1 metër.

Në Bulqizë situata është rënduar këtë mëngjes.

Është bërë tepër e vështirë dalja prej qytetit.
Rruga nacionale Bulqizë-Peshkopi kalohet me shumë vështirësi dhe herë pas herë bllokohet. Në qytet trashësia e borës shkon deri në gjysmë metri.

Elbasan. Reshjet e dëborës i kanë lënë vend atyre të shiut në Elbasan e për pasojë gjatë gjithë natës është zhbllokuar situata në mjaft akse. Të gjitha rrugët nacionale janë të hapura përfshirë aksin problematik të një dite më parë Librazhd- Prrenjas- Qaf Thanë.

Po kështu të hapura janë akset Cërrik- Gramsh dhe Elbasan- Gjinar. I vetmi aks që paraqet probleme është ai Librazhd- Stëbleve, tek kthesa e Lunikut.

Me urdhër të DAR nuk zhvillohet mësim në asnjë shkollë të Librazhdit dhe Prrenjasit, ndërkohë që në Elbasan nuk zhvillohet mësim në shkollën e fshatit Shmil.

Si pasojë e hapjes së rrugës në Gramsh mësuesit kanë shkuar në shkollë dhe shkollat janë të hapura. Fatmirësisht për shkak të terrenit fushor nuk ka probleme në Cërrik, Belsh dhe Peqin.

Librazhd.Ndërkohë probleme ka me myngesën e energjisë elektrike në disa fshatra të bashkisë Librazhd dhe Prrenjas, si në Lunik, Orenjë, Qarrishtë dhe Mokër, një pjesë të të cilave i përfshin Pogradeci. Bëhet me dije se specialistët e OSHEE po punojnë në terren për të rikthyer energjinë elektrike.

Pogradec. Edhe Pogradeci po përballet këto ditë me kushte të rënduara atmosferike, ashtu si pjesa më e madhe e vendit. Bashkia e Pogradecit njoftoi se sot është pezulluar mësimi në të gjitha kopshtet, shkollat 9-vjeçare dhe të mesme të qytetit.

Korçë. Në disa zona në qarkun e Korçës bora ka arritur trashësinë 1 metër. Aksi Korçë-Dardhë, Korçë-Ersekë, Pustec-Goricë janë të kalueshëm me shumë vështirësi me zinxhirë.

Shumë nga rrugët e fshatrave janë të bllokuara dhe të pakalueshme. Vithkuq, Lekas, Moglicë, Panarit, Podgorie, Vreshtas, Sheqeras, Shengjergj, Dardhas, prej mbrëmë janë pa energji.

Gjirokastër. Në Gjirokastër nuk ka patur reshje bore gjatë natës dhe situata është disi më e mirë vetëm për akset nacionale.

Edhe aksi drejt Kakavijës është i kalueshëm. Mbeten të bllokuara të gjitha njësitë administrative mbi 400 m edhe qarkullimi në pjesën e sipërme të qytetit të Gjirokastrës nuk është i mundur.